الأحد، 16 أغسطس 2009

انا لله وانا اليه راجعون


اكثر من 41 امرأه وطفل توفوا في حادث مأساوي ابسبه نار شبت في خيمه عرس .. الله يصبر أهاليهم يارب .. وصبر أهالي المصابين .. وقومهم بالسلامه انشاءالله .
نتقدم بأحرالتعازي إلى أهالـــي المتــوفين في حادث حريق الجهـــراء، داعين المولى أن يلهمهم الصبر والسلـــوان، ويسكــن من فقدوهم الجنــــة.
تحديث
الزوجه الاولى اعترفت : انا احرقت الخيمه لأفسد عليهم ليلتهم .. ولم اتوقع سقوط ضحايا !!!
موتي الحريم مع بناتهم ..والكبار بالسن.. واليهال.. والبنات لصغار و4 من الحوامل توفو.. والخامسه اولدت بين الحريجه وطارو فيها المستشفى مع مولودها .. والي احترقت وماتت على طول ..ولي تعذبت وماتت.. ولي اختنقت ..ولي اتشوهو حتن ليل حين موقادرين يتعرفون عليهم ولي ولي .. هذي غير مأساه أهاليهم الله يصبرهم يارب .
كانت تردد : أبي اخرب العرس لأني احب زوجي .
وين يصرفونها لج ياالزوجه الاولى .. !!!! عمرها 23 سنه بس .. وعندها طفلين... اعفست وعذبت ديره كامله ابسبه الغيره ..عسى بس ابردت جبدج يالزوجه الأولى .. !!!! ماقول الا حسبي الله عليج .
هذا التحديث من جريده الرأي .

هناك 51 تعليقًا:

kazmawy يقول...

حسبى الله ونعم الوكيل الله يرحمهم برحمته ويواسى اهلهم
الله يعين العيال والامهات والبنات والاباء والازواج والاصدقاء
تخيل شكل البنية الى ماتت امها واختها لا حول ولا قوة الا بالله
يارب تحفظنا وتحفظ عيالنا واهلنا من كل سوء يارب

Fishah يقول...

الله يرحمهم برحمته .. ويغفرلهم
ويصبر اهاليهم يا رب

:(

لاحول ولا قوة الا بالله

حياتي هدف مو عبث يقول...

أمين يارب
يزاج الله خير
الله يرحمهم ويصبر أهلهم

DoDoq8 يقول...

اللهم امين

الله يصبرهم ويمسح على قلوبهم

Hope يقول...

لا حول ولا قوة الا بالله
الله يرحمهم و يغفر لهم و يصبر أهاليهم

ReLaaaX يقول...

الله يرحمهم ويصبر اهاليهم :/

ياقليبي بينهم يهال هذا اللي مقطع قلبي زياده

Sn3a يقول...

الله يرحم موتاهم
يشفي عليلهم
ويصبر قلب اهاليهم

الله يحفظج ياكويت

رورو الشخبوطه يقول...

الله يرحمهم يارب..

انا اليوم من الصبح وكلمالي اسمع عن وحده توفت من بيت فلان 2 و بنت فلان واللي حامل واللي كانوا موجودين والله عطاهم عمريديد يسولفون الله يعينهم ويصبر اهلهم ..

The.One يقول...

الله يصبرهم ان شاءالله ,الفرح انقلب عزا

و يرحمهم ان شاءالله

مشكورة

{~المباركية~} يقول...

انا لله وانا اليه راجعون
الله يصبر اهاليهم

افتقدنا تدويناتكم :)

شاي الضحى يقول...

الله يرحمهم ويغفر لهم ومثواهم الجنه انشالله

والله يصبر اهاليهم :((((

Chaotic pOsha يقول...

تصدقين عاد يقولون انها اشاعة بس انا ما اتوقع انها اشاعة واكيد يبين بعدين

واذا السالفة صج صراحة مادري شقول
هذي يا انها مينونه يا الحره يننتها بس مو عذر حق اللي سوته في الناس

ابشع شي ان الانسان يموت حرقا

غير معرف يقول...

انا لله وانا اليه راجعون
الله يصبر اهاليهم يا رب ويغمد روحهم الجنة

ZeeZoo يقول...

الله يرحمهم أجمعين ويسهل شفاء الجرحى
والله يعينهم على مصابهم
انشالله تكون اول واخر فاجعة بالكويت

نون النساء يقول...

انا لله وإنا إليه راجعون

لا حول ولا قوة إلا بالله


الله يرحمهم ويشافي المصابين ان شاء الله

haifa يقول...

تبين الصج انا طليقة المعرس كاسرة خاطري.. واضح جدا انها ماتوقعت هالكارثة يمكن كان في بالها الناس تقب وتنحاش ويخترب العرس.. لاتنسون انها صغيرة وبما انها ام لطفلين تحصلينها ماكملت حتى تعليمها.. لكن قمة المسخرة اهوا المعرس الي ماخذ العروس ومقضينها شهر عسل باجدعها فندق ولا جن الناس ماتت بسبته ولا جنه الديرة مقلوبة من عمايله!!

Sweet Revenge يقول...

لاحول ولاقوة الا بالله الله يرحمهم بواسع رحمته
معقولة هالانسانه ,قتلت هالناس كلها وشردت اسر علشان واحد ,لا والمعرس مع العروس بالفندق يعني ماستفادة شي
شلون تفكر هذي بس ,ضيعت الناس وضيعت نفسها وضيعت عيالها
لاحول ولاقوة الا بالله :(.

النور القريب يقول...

السلام عليكم ورحمة الله وبركاته

ماشاء الله المدونة رائعه
أتمني لكم التوفيق:)

وبالنسبة للموضوع
أنا قريته في الجريدة الوطن
والرأي العام وتفاجأت
من الخبر وكتبت عن الموضوع
كمقاله في مدونتي
عددت الى ماتوا كبير
وفي ليلة وحده
شيء يعور القلب

أقتباس
--------
الله يرحمهم برحمته .. ويغفرلهم
ويصبر اهاليهم يا رب
--------------------------

أمين يارب

أخوج:النور القريب

-mate يقول...

تكفين شتقول؟

" انا احرقت الخيمه لأفسد عليهم ليلتهم .. ولم اتوقع سقوط ضحايا "

انزين يابنت الذين, ليش ما حرقتي خيمتهم قبل العرس؟ ليش ما حذفتي على سياييرهم صخر وكسرتي جاماتهم؟ ليش ما شريتي قطيع خرفان وهديتيهم عليهم داخل الخيمة أو (زهاوية يطيرون)؟ ليش ما خربتي عيشتهم بأي طريقة .. لكن ماذنبهم أن يموتوا في ليلة فرح؟ وإذا كان زوجك السابق تغارين عليه أو أنك أردت ان تفسدي عليه وعلى عيشته, لماذا لم يكون ضررك اقتصر عليه هو دون أن يشمل أناس أبرياء ممن لاحول لهم ولا قوة؟
أهل المتضررين يريدون القصاص, ولكم في القصاص حياة يا أولي الألباب .. إذا ثبُت على الجانية عملها الشنيع, فأنا أتمنى إنزال أقصى عقوبة عليها وليس هناك رحمة أو شفقة أو نأخذ الأمر نيتها الصافية وأنها لم ترد قتل الأبرياء ولكنها أرادت فقط في إفساد العرس .. !! يا لسذاجتها المسكينة ..

-mate يقول...

haifa

لو كانت وحدة من أهلك بالعرس تضررتت أو توفت .. ما كنتي تقولين هالكلام!

غير معرف يقول...

الله يرحمهم ..
اقروا الفاتحه واهدو ثوابها لارواحهم

هيفاياعمري لاتحطين بذمتج وتتقولين على المعرس استغفري الله شعرفج بحالهم الحين ؟قاعده معاهم ولا بس حجي جرايد وتزيدونه بهارات ...هذه مصيبه والكل متاثر فيها فمابالج بالمعرس وزوجته !!

haifa يقول...

-mate
اولا احنا مانحضر عرس واحد مثنى ثانيا انا اتكلم بمنطق هذي انسانه انجرحت وحياتها اصلا انتهت من تزوج ريلها الي ما اهتم وحدة عمرها 23 وعندها طفلين منو بياخذها كلش كلش بياخذها شايب لا وبيتشرط عيالها يكونون عند امها او عند ابوهم فتصرفها بديهي ولانها صغيرة ومقهورة فكرت تخرب العرس بنية تخريب مو نية قتل وانتي الله يهداج يايه تقولين لو اهلج من الضحايا حتن لو اهلي من الضحايا ترى كل اهل الكويت اهلنا بس مانصير ظالمين ونركب الموجة

haifa يقول...

لغير معرف

لا ادخل بذمتي شوفي انتي مو مستوعبة وهم مصدومة ان المعرس بفندق شي مايدش العقل .. لكن ردي لكل تصريحات كل الجرايد يوم حققوا مع المعرس كلهم كتبوا "تم استدعاء العريس للسماع إلى إفادته وكان مع عروسه في أحد الفنادق ولدى سؤاله ما إن كان يتهم زوجته الاولى نفى، وبسؤاله أيضا إن كان يعرف من أقدم على هذه الفعلة كرر النفي"

وهذا واحد من المصادر بتحصلين كاتبين عن معرس الخيبة بنهاية الفقرة الاولى
http://www.alarabiya.net/articles/2009/08/17/82038.html

master يقول...

Haifa:
أنا جذي نفسج قاعده أفكر ... طالع الحره إسوت فيها!! شي إيخرع ، ما همها احد ، من كثر ما مقهوره ، ما فكرت ، ما فكرت شنو ممكن يصير من إلي سوته، شي صج صج إيخرع. تخيلوا شي بينها وبين زوجها خلها تذبح ناس مالهم علاقة بالسالفه. هذي شنو حالتها ألحين لمه تشوف هالناس المتوفيه ؟
وااااي الله لا يوصلنا لحالتها إلي نعمت و ذبحت الدنيا
الله يرحمهم و يصبر أهاليهم

غير معرف يقول...

هيفا انا بمستشفى ابن سينا و قبل يوم يابولنا مصابين لان ماكو اماكن بالمستشفيات و من بينهم المعرس =)

استغفري ربج و لاتحطين بذمتج و بسنا من الكلام و القيل و القال و نكتفي بالترحم عليهم
و العروس امها و خواتها توفو بالعرس اتوقعين راح تكون بالفندق معاه عايشه حياتها !!؟
السالفه نفكر فيها بعقلنا قبل لا نصدق كلام الجرايد و الناس

و بعدين ياما مطلقات عيالهم طولهم و تزوجو احسن الناس بعد
هذا نصيب مايوقف على مطلقه ولا ياهل و لا عندها 10 يهال ولا 2
و الريل و الزواج موشي ضروري الحين لو اهيا بكامل عقلها جان كملت تعليمها و اشتغلت

haifa يقول...

ماستر

فعلا كلامج صح وهذا الي مخليها كاسرة خاطري يعني اهيا نفسها انصدمت من هول الي صار ماكانت حاسبة حساب هالشي لدرجة انها فكرت تنتحر .. انا الجاني الحقيقي بعيني اهوا المعرس الي اشعل هالنار من البداية بقلبها.. اهوا شبع منها وقط عياله بجبدها وطقله عروس يديدة واهيا خلاص الحياة عندها انتهت وهم صارت مطلقة بمجتمع مايرحم..

haifa يقول...

غير معرف

كل القنوات الفضائية وكل الجرايد والمواقع لاحظي كلللهم قالوا نفس الكلمة نادوا المعرس من الفندق للتحقيق معاه .. وبما انهم كلهم فهذا دليل ان مصدرهم واحد واهيا ادارة التحقيقات بالداخلية..
وسالفة تزوجوا عيالهم طولهم تصير بس الي يصير اكثر ان مطلقات ماوصلوا ال 25 حياتهم انتهت خاصة الي عندها يهال..

غير معرف يقول...

فيونكات


نبي مواضيع يديدة


ملينا من الكآبة

غير معرف يقول...

حسبي الله ونعم الوكييييل لا حول ولا قوة الا بالله ...
وان شاء الله تتعذب هذي السوسه وين مخها ما توقعت سقوط ضحايا يعني شابه حريجه متوقعه سقوط شنو يعني نعول على راسها باطه جبدي ...

-mate يقول...

هيفاء

سلامة عمرك ..!

قررت الانتقام مو من زوجها اللي طلقها وإنما من خواته

اقتباس من الصفحة الأولى
"وكما قالت، فقد أرادت الانتقام من شقيقات زوجها- وليس طليقها كما تردد من قبل- «لأنهن دمرن حياتي». "

وتقول في صفحة 8

عندما سألوها عن وجه الخلاف بينها وبين زوجها

قالت ان زوجها بلا شخصية .. وخلافها مع شقيقاتها .. فهن من طردنني من المنزل وقررن تزويجه مرة أخرى نكاية بي وحطمن حياتي وحياة طفلي لذا قررت الانتقام ..!

إذاً .. الثأر ليس للزوج مثل ما انتي ورابط العربية اللي حاطته, الثأر لأخوات الزوج السابق

للمزيد

تفضلي مدونتي والبوست اللي امنزله, لأني شخصياً مو مصدق الكلام اللي قلتيه

http://stillmate.blogspot.com/2009/08/blog-post_18.html

-mate يقول...

نسيت لا أذكر المصدر, جريدة القبس.

lawyer يقول...

انا لي الحين مصدومه

haifa يقول...

-mate

براحتك مو لازم تصدقة هذا حقك وهذي حدود عقلك .. كل الفضائيات والجرايد والشرطة غلط وانت الصح!!!

غير معرف يقول...

هيفا

الفضائيات قبل امس باليل صرحو ان " المجرمه " موجوده بمخفر الجهرا و المخفر محاصر من اهالي الشهداء

3 فضائيات حطته خبر عاجل و فضائيه قالته على طول ببرنامج كانو عارضينه

و خدمتين اخباريتين دزو الخبر مسج

بعد ربع ساعه اتصلت احد الفضائيات بثابت المهنا و نفى هذا الخبر و قال انها بإدارة المباحث الجنائيه بالسالميه

عمره كلام الفضائيات و الجرايد ماينتصدق و هالشي معروف

و بعدين ياحبيبتي انتي يايه تقولين ماوصلو 25 حياتهم انتهت خلاص ؟؟
اولا على اي اساس انتي قاعده تحكمين ؟ ممكن تيبين لي ادله و نسبه موثوقه من مصدر ؟

ثانيا وايد هامتج حياتها الي انتهت لانها مطلقه و عندها عيال و ماكملت تعليمها ؟؟؟؟
و هامج المعرس و العروس وين بيكونون ؟

ليش ماهمتج حياة الي احترقت يم بنتها الي عمرها 3 سنوات و تيتمت البنت
ليش ماهمتج حياةالي خواته ال 3 بعد مانزلهم العرس ياله خبر وفاتهم بساعه
ليش ماهمتج حياة الي احترقت مرته و بناته بنفس اليوم
ليش ماهمتج حياة الي احترقت امها بليلة عرسها
ليش ماهمتج حياة اهل ال 3 الي احترقو اهما و الي في بطنهم
هالناس اشذنبهم ابيج تقولين لي لاتقعدين تقولين مسكينه مطلقه و عندها عيال لا بس ابيج تجاوبيني اشذنبهم ؟

و ياما ناس تطلقو و كاهم موجودين عايشين حياتهم طبيعيه الحمدلله الوحده لي تطلقت عندها اهل ترى ماتنقط بالشارع عندها ديره عندها قانون ماتنتهي الحياة على الطلاق
و حياتها مو بس زواج عشان تنتهي لما اتطلق

و من قالج ياحبيبتي ان الي ياخذونهم شياب ؟؟ عفوا انتي عايشه معانا بهالدنيا ؟ مومعقوله لي هالدرجه تفكيرج عن المطلقه انها بتكون منبوذه و محد يبيها =\ شي غريب الصراحه

haifa يقول...

غير معرف

حقيقة انتي الي موعايشة معانا وماتدرين بحال المطلقات وشنو مصير الوحدة فيهم بمجتمعنا بهالايام خاصة الي عندها يهال .. مادري عبالج مخامط عليهم.. اهوا شبع منها وقطها وحياتها انتهت واهوا ولا هامة ولا ياب خبر قطها وقط عياله بجبدها وراح يونس روحة ويبدا بداية يديدة .. واهيا لو كان عندها نية قتل اعتقد ما فكرت تشب حريجة جان سوت اي شي ثاني جان طعنت سممت سوت اي شي بس اهيا كان كل فكرها تخرب العرس مجرد تخريب .. مثل ماخربوا لها حياتها ودمروها..
على فكرة زين ان محد فيكم قاضي والا جان على الدنيا السلام.. الي يشوف قضية دايما يبحث عن المسببات الاساسية وتالي يحكم.. ولعلمج قانونا ماعليها شي لان نية القتل منفية واصغر محامي يقدر يطلعها براءة

dana يقول...

اخت هيفا ماشالله عليج لوالمجرمه نصره تدري عنج جان عينت محاميه لها وبعدين انتي شدراج انها مسكينه وعايشه حياه تعيسه مع ريلها يمكن اهيه مره موزينه وبعدين المعرس ماله ذنب وانتي شدراج انه قاعد مع مرته مستانس ومايدري عن الدنيا ترا ناس من اهله احترقوا وتفحموا اذا انتي ناسيه والعروس اليديده اللي ماتهنت امها وخالتها ومرت اخوها بعد احترقوا خافي ربج حتى الياهل يدري انه الي سوت غلط وصج لقالوا عذر اقبح من ذنب مسكينه تبي تخرب العرس وبعدين اذا تبي تخرب تحرق الخيمه قبل لا ايووون الاوادم مو بعد ماانترست الخيمه وتاكدت انه الناس فيها
وبعدين الناس الي ماتوا كل بيت بالجهرا في تقريبا شخصين او اكثر متوفين هذيلا شنو ذنبهم!؟
وعدم اكمالها تعليمها مو عذر لها
الصراحه انه مره بس استحي انه في ناس من بنات جنسي بهالعقليه
ماشالله زادوا نماذج نصره بالديره
اللهم تممنا بعقولنا

haifa يقول...

DANA

سوري بس اترفع عن الرد عليج
اسلوب شاي الضحى هذا وعقلية اصحابة احقر من ان ينرد عليه

haifa يقول...

على فكرة انا عارفة ان كل الردود من شخص واحد كل مرة يدش بغير معرف او اسم بدون تسجيل لكن سبحان الله الاسلوب الواحد يفضحة بس بنشوف نهايتها معها

غير معرف يقول...

هيفا

من وين يبتي ان كلنا شخص واحد ؟

الفضائيات كلها و الجرايد قالت ؟؟

لاني دانه ولا شي

انا

marshmallow-s

هذا اسم مدونتي بس من زمان موقاعده ادش بحسابي و اصلا من زمان ماحطيت تعليق بمدونه بس شفت تعليقج وقلت لازم اتكلم

غير معرف يقول...

حبيبتي ماجاوبتيني على سؤالي و على ولا شي انا قلته لج
قاعده تلفين و تدورين على نفس المحور
يعني مايبتيلي نسبة و ارقام صحيحه و على اي اساس تنسبين كلامج ؟
شنو لعب فيها و قطها !!! ترى عيب =)

يمكن مجتمعج الي عايشه فيه غير عن مجتمع الكل الله اعلم بس اذا العيشه جذي بمجتمعج الله يعنكم و يرزقهم العقل

و يالله الله يرزقج الزوج الصالح انشالله و تيبين منه عيال عشان ماتضيعين
بس اذا حب ياخذ الثانيه بلغينا لان شكلج بتنسفين الديره بكبرها مو بس الخيمه

اسفه على الاطاله بالردود بس توقعتج شخص فاهم اقدر اتناقش معاه

اترفع عن النقاش ولا عوده لي بالردود اهني

haifa يقول...

قسم بالله انج موتيني ضحك
ومشالله حدود عقلج عرفناها
يبا قلنالج اسلوب وعقليات شاي الضحى نترفع عن الرد عليها
من ردج وافلامج طلعتي حدج مسيجينة وعقلج على قدج..

fatto يقول...
أزال المؤلف هذا التعليق.
dana يقول...

الللي يبي النقاش يصير قده مو لما شاف انه الغالبيه ضده قال اترفع عن الرد الافضل الواحد يقول ماعندي رد
وبعدين انا قاعده اعبر عن راييي بمدونه الخوات فيونكات وانا اسمي المكتوب دانه
الحمدالله الله متممني بعقلي ماني ياهل كل ساع ادش باسم
اعتقد هالفيديو يبين اللي صار يوم الحادثه سمعي اصوات المساكين بس
الله يرحمهم
http://www.youtube.com/watch?v=jnRkrZwFo9U&eurl=http

غير معرف يقول...

بس اذا حب ياخذ الثانيه بلغينا لان شكلج بتنسفين الديره بكبرها مو بس الخيمه

???????

ليش متوقعة انها سوف تفعل نفس الشيء ؟ هل لأنها دافعت عنها فقط ؟!!

fatto يقول...

جزاكم الله خير جميعا .. والله يرحمهم جميعا وصبر اهالي المصابين ونشاءالله يطلعون بالسلامه

fatto يقول...

هيفا :
هلا فيج :)
من وجهه نظري التعليم ماله شغل بالي سوته .. الله عطانه نعمه العقل .. وبالعقل انعرف الصح من الغلط.. بس الظاهر من كثر ما اهي امعصبه ومحتره وبتموت من القهر صارت ماتشوف الصح من الغلط .. والزوج اشدراه ان في مصيبه صايره لويدري جان اتهقين امكمل العسل مع مرته .. طبعا لأ .. بس اهي الحين حدها منهاره ودها اتموت اليوم قبل باجر بلي سوته .. وشكرا على وجهه نظرج :)






سويت رفنج :
هلا فيج :)
الله يعينهم جميها والله يرحمهم





النور القريب :
هلا فيك :)
ومشكور على المجامله الحلوه على مدونتنه

الله يرحمهم جميعا






ميت :
هلا اخوي ميت :)
اهم شي اتطر زهيويه لوووول ميت تكفه لاتظحكني .. احنه في عزا .
بس كلامك صح والله .. عقلها الظاهر ماكان معاها حزتها . الله يرحمهم .







غير معرف 18 أغسطس, 2009 04:50 م

مادري اشلون فكرت ابهالشي .. يعني في الف طريقه وطريقه انها اتخرب العرس بس تحرق !! يعني مادري اشلون اقتنعت ابهالفكره !!!!
بس صار الي صار والله يرحمهم يارب .

fatto يقول...

هيفا + ميت + غير معرف + دانه + marshmallow


حبايبي هدو ..كل واحد قاعد يشوف الموضوع ابزاويه معينه.. فهالشي عادي لأن كل واحد له وجهه نظر .. ومهما قلتو كل واحد مقتنع ابكلامه .

haifa يقول...

DANA

مو انا الي اتهرب من نقاش ياشطورة.. واذا انتي مالج بالقصر الا امس العصر وتوج مدونة يديدة فروحي سالي عن هيفا ومري مدونتي اقري مواضيعي ويمكن تدركين وقتها ترفعي عن اسلوب شاي الضحى مالج.. النقاش يحتاج خلفية واسلوب وحجج للاقناع والاهم عدم التعصب.. انا قلت رايي واحترمت راي غيري .. بس انتوا ماتبون غير تسمعون وترددون الراي الواحد مثل الريكوردرات بكل اسف..
واعتقد الغير معرف الي بعدي رده وافي عليج بالعربي تطنز على عقليتج.. وبس

haifa يقول...

فاتو

حبيبتي انا معاج.. شوفي محد بالدنيا كلها يختلف على ان الي سوته غلط هالشي منتهين منه بس نقاشنا على الاسباب الي خلتها تقدم على هالعمل.. واعتقد انا ذكرتها بردودي السابقة .. واذا على التعليم لا اكيد له دور مهم وجذري .. المراة المتعلمة خاصة تعليم عالي.. مداركها اوسع والمتعلمة دائما تكون عاملة .. والعمل ومشاكلة والاحتكاك بالناس كلها مسببات تساعد على تحكم الشخص بنفسه وتحكيم عقلة وضبط انفعالاته يعني تقدرين تقولين مدرب نفسه.. لكن نصرة تعليمها محدود وريلها مانعها من الشغل والطلعات وهذا الكلام اهوا بنفسه قاله بمقابلته بالقبس.. فتقدرين تقولين عالمها محدود وسنها صغير وخبرتها بالحياة معدومة.. وهالريل الي اهوا حياتها خذلها ولعلمج ماطلقها بعد.. فردت فعلها كانت متوقعة انها تخرب العرس كتخريب .. وماكان بنيتها القتل وهالشي واضح.. يعني مثلا الي قتلوا الطفلة آمنة كانوا مبيتين القتل وهتك العرض بس نصرة لا.. ولهالسبب ياعزيزتي آنا شخصية أنادي بتحرر المرأة فكريا.. وهالشي بعيد جدا عن الانحلال.. لان التحرر الفكري ماينبع غير من الثقافة والعلم والثقة بالنفس والحفاظ عليها.. وبناء شخصية متزنة وعقل واعي قادر على وزن الامور بنصابها الصحيح.. مو ناس جاهلة ثقافتها ماتطلع عن ثقافة شاي ضحى.. هالنوعية ماتدرك اختلاف الاراء ولا تبحث بالراي الاخر.. لا تهاجمج هجوم مضحك بحدود عقلها وتفكيرها واهتماماتها..

fatto يقول...

هيفا :
انا فاهمه انتي شنو تبين توصليله .. وفاهمه عدل كل كلمه قلتيها .. وانا معاج ابوجهه نظرج .
في دكتور نفسي قابلوه في قناه الوطن جان شفتيه .. اقنعني ابكلامه .. يقول يعتقد ويمكن متأكد بعد من ان الي حواليها سواء من اهلها او رفيجاتها امهدينها جان ماسوت الي سوته بس الي حواليها يبون يوقفون معاها ابمشكلتها قامو من غير قصد انهم يشيشونها .. فهني عقلها صار عمي وسوت الي سوته .. من هالناحيه مسكينه .. هذا قصدج صح ؟

haifa يقول...

فاتو
فعلا كلامه صح .. بس مافكرتي ليش من الاساس فكرالي حوالينها كان لهم سبب بالتاثير عليها.. لانها بالاساس شخصيتها ما انبنت على مقومات سليمة لا علم لا خبرة لا عمل فطبيعي ان الي حواليها بيكون لهم تأثير كبير عليها ..