معقولة هذي ديرتي الحبيبة

أختي حبيبتي مسدوحة بمستشفى مبارك الكبير تعبانه شوي ...أقولج ما عليج إلا العافية والله يقومج بالسلامة يارب وديري بالج على روحج ...

المهم ندخل بصلب الموضوع رايحين كلنا نزورها واحنا بالاسانسير ركبت معانا وحده ومعاها واحد من البورتر وشايل معاه مكيف ...؟؟؟؟ أنا علامة استفهام شالسالفة وين يايين ليش يايبين مكيف ولا ويديد وبكرتونه...جان وحده من خواتي تقول إي يقولون التكييف خربان والسبة الرطوبة ؟؟؟؟؟؟؟؟؟؟؟؟؟؟؟؟؟

أي شي يعني المرضى قاعدين بالخيسة ...والطامة الكبرى يوم وصلنا ولا إختي حاطة لها مروحة عشان تبرد عليها ...قلت لها وي اللي يدش صاحي يطلع مريض ...ردي البيت أحسن لج...

بس للأسف ما يصير لازم تكمل العلاج عندهم...ويقولون إنه التكييف اللي بالمستشفى يشتغل على ماي وإذا صار رطوبة يخترب ..يعني شلون أهما داشين يتعالجون ولا شنو بالضبط ...ما تقدرون تقعدون ساعة عند المريض من الحر ...بس الغريب إنه الممرات التكييف زين وشغاّل بس الغرف خيسة ..؟؟؟

والأدهى والأمر إنه السرير اللي نايمة عليه إختي مكتوب عليه ( broken bed ) معقوله السرير مكسور ...يعني شلون المريض يدير باله وأهوا نايم ولا شنو...

وأنا من دشيت وأقول شنو هالورقة اللي على السرير ماني عارفه ومو ميزة شنو مكتوب ؟؟؟؟؟ وعدلت الورقة ولا أنصدم ....أمبيه يعني نعمر بره ومستشفياتنا الله بالخير ؟؟؟؟؟؟؟؟؟!!!!!!هذي مروحة إختي يعني المستشفى مو مسئول عن توفير شي يبرد على المرضى كل أسرة تتكفل بمريضها !!!!!!!!!!!!!!!

خنت حيلي أخيتي نايمة على هالسرير ؟؟؟ من صجكم إحنا بالكويت يعني ....انا اللي شايفه بعيني مو قادرة استوعب ....

شر البلية ما يضحك ...لوووووووووووول

مأساة في بيتي

عقب الفطور وعقب ما عينا من الله الخير ...صار شي ما كانت حاسبه حسابه ..بس ما قول إلا الحمد الله على كل حال ..الللي صار إنه مودو طلب مني جاي ولزّم عليّ إسم الله على عمره يبي جاي مع بسكوت ..كل ما أقوله يا ماما الحين بنروح بيت يدتك إكل هناك عفس ويهه...ومد بوزه ولازم ألحين قمت حطيت ماي بالغلاية ويسور يمي ويحوس تحتي ومزهبه كوبين واحد حق مودو ووايد حق يسور ..وأنا أصب الماي المغلي بالأكواب يسور قالي شنو هذا ماما وسحب الصينية والأكواب طاحت على ريوله وقام يصرخ ويبجي وكالعاده أنا تدودهت وما أدري شسوي وأبوه مو موجود...ركض فصخته ملابسه ووديته تكرمون الحمام وغسلته بماي بارد ....ويبجي فديته ويقول حطي لي بلاستر ..أي بلاستر يا يمه ...فخذه تصلخ اليلد منه ...قمت ودقيت على أبوه ومسكين ييه طيران أخذنا وعلى المستوصف على طول دشينا الدكتور ومنه على غرفة التضميد وضمدوه ...

محروس من العين حبيبي ...إدعوا له بالشفا كلش ضايق خلقه وما يعبر يمشي ...يعور القلب حبيبي..:(

تذكرت حزّتها اللي شبت فيهم الخيمة ...شقالت روحهم ...واي هذا ماي حار جذيه سوّه شلون النار نفسها ...الله يرحمهم برحمته ويجازي اللي كان السبب ..

يسور عقب التضميد ...حبيبي تكبر وتنسى وعساها آخر آلامك ..

Om MoD

bossini

قبل فترة كنت رايحة مع الكتاكيت مودو ويسور نشتري أغراض حق عيد ميلاد مودو ورحنا سنتر بوينت ..وإحنا نفتر شفت تي شيرتات تونّس جان أقول حق الكتاكيت ماما شرايكم حلوين مودو طبعا بدون تردد إي ماما نبي ..عاد التي شيرتات لونها أبيض وبالنص في رسمة ومعاهم ألوان ..يعني كل ياهل يطلع موهبته على التي شيرت ...عليكم بالعافية كتاكيتي :)...لا يفوتكم التلوين ...عيالي فنانين ما شاء الله عليهم :)

حلوة فكرتها ..

مودو يلوّن

يسور يلوّن

هذا اجتهاد يسورهذا إنتاج مودو وأنا ساعدته شويّ

وما قلت لكم ذاك اليوم كشخوا فيها وطلعوا ..

ومبارك عليكم الشهر :)

تسلم الأيادي

حدي متأخرة بشكري لج حبيبتي stella ما قصرتي ...طرشت لي ذاك اليوم غدى والمناسبة سفر شغالتي ..كسرت خاطرها وقالت لي بطبخ لج يوم وأطرش لج ومو أي طبق ...طبق كل ما اسمعها تقول حق شغالتها تسويه أقولها بيي اليوم أتغدى عندكم :) وتقولي حياج ...بس من صجكم بروح ..:)

وأخيرا حققت لي حلمي وجربت هالأكلة منهم ..لأني سويتها بس الطريقة كانت مختلفة كليا ...طبعا تشوقتوا وتبون تعرفون شنو هالطبق الخطير اسمه ..مقلوبه على الطريقة السورية رهييييييييييب عبارة عن عيش متروس دارسين مع بيديان وبطاط ولحم وتقدرون تسوونه مع دياي بس مع اللحم حلو مع إني أفضل الدياي ومو ذاك الزود مع اللحم بس كليته وقلت لها امبيه إيين حده لذيذ ..

يسلمو ومشكورة ووووو كل كلمات الشكر اتقدم فيها لج :)

وبالعافية على قلبي ...

صلاله 2009

مو اول مره اروحلها .. حلوه مو حلوه هذا يرد على الشخص نفسه وشنو يحب ..أنا اسكن أمام البحر وعندنا بيت هناك واعتبره مثل الشاليه

الي يبحث عن القهاوي مثل كوستا وتوابعها مافي ..مجمعات ومولات مثل الافنيوز مافي ...مطاعم راقيه مافي ... كنتاكي وبيتزاهت بس ..ومادري ماكليت منهم ..كلا ناكل بالبيت أضمن =) ..خوش تشجيع حق الي يبي اروح لها ...بس أحبها ..أرتحت لها ليش مادري يمكن سافرت مع ..أهلي ..بيتنا ..جيرانا كويتيين ..ربعنا الاماراتيين ابروعهم 3 جيبات ومني باص يمكن ...كشتاتنا نطلع مع بعض السيارات ماتقل عن 4 جيبات ..يعني يمعه والغدى مره شوي ومره اجدورنا معانا ...مو كل يوم انروح الجبل عندنا البحر مانتسبح فيه لا لانه صاير مثل الوحش الهايج ..بس نفرش المده ونشرب شاينا وقهوتنا وله امارس رياضه المشي على رماله الناعمه ...الله وناسه مع هواء منعش ورذاذ من المطر او من موج هائج ..وعلى يسارنا خور فيه تقريبا 50 نوع من الطيور المهاجره ...وناسه ...ويسارنا حديقه عامه (مو مثل حدايق العامه الي في الكويت لا ) كلها كواسكو وطيور ودوارف ابلاش وكبيره حق اليهال ...يمنا القهوى (القهوى الشعبيه احسن منه ) بس يعتبر مقهى شعبي ناكل فيه برد ...جذي سفرتي بين الجبل والبحر ..بين فتره وفتره اروح أرض المعارض يسمونه البلديه وفيه رقصات شعبيه ومعارض ومطاعم .

بس استانسنا ..في البساطه ..وسوقها ..مثل شارع المحرق الي في البحرين الي فيه الحلوى والعبي والعطورات العربيه عرفتوه ..وجمعياتهم عندهم لولو هايبر والاستقلال سنتر ..فنادقها جدا بسيطه ..تفي بالغرض ..بس حبيتها ...عيشتها جدا غاليا وتكاسيها أغلى ..أجرنا جيب باليوميه احسن ...أخليكم مع الطبيعه الي وهبها الخالق لهم ..

قمه الجبل..حلو المكان بس ماتقدرون تكشتون فيه من كثر الصخر ..بس للتمشي وستكشاف المكان .








في قمه الجبل ..صخور شامخه يتخللها خضره ناطقه بروعه جمال الخالق..اتشوفون من البعيد صحراء رمليه وبعدها البحر الهايج في وديانها مياه جاريه وشلالات بس هذي السنه ما كان فيه شلالات المطر هذي السنه قليل وطبيعه تعبر بصمت...وآثار لمشعل نار تجدونه هنا وهناك ..

الصور إشوي مظلمه ...يديده في التصوير اعتبر متدربه ..=) وحتى الفوتوشب ماستخدمته ..في المرات القادمه
ياسبحان الله المبدع المصور

زوار الجبال في كل كهف وله وادي وله قمه تجدونهم ...مايخلون مكان مايتركون آثار سياراتهم عليها

هذا البحر بجانب بيتنا (منزل الوالد الله يحفظه ) صوت الموج من كثر قوته نسمعه وحنا في داخل البيت (أختي اتخاف تتمشى على البحر اتقول فلم ررعب ) بس أنا أشوفه جمال ..اليوم الظباب خاف اشوي علشان جذي قدرت اصور ..ترى في ناس على شاطيء بس دايما اتشوفونهم مثل الاشباح =) من الظباب

البحر هائج ..بس ممتع وحلو دايما انا اجلس او امشي هناك

تكثر فيها العيون والكهوف

وسلامتكم

احساس الطفوله

2 في1 كريم مع بودر ..ماخلو شي ..من زمان شاريته بس ماجربته توني اجربه لولدي ..

الي احب احط البودر حق إعياله ومن غير مايدمرهم ويتناثر ودمرج بعد وحتى حق الي عندهم الحساسيه هذا يصلح ..جربته على إيدي واي نعومه وتحسين بالبودر بس لما ينشف الكريم ..حبيته ...من ماذركير ..جربوه

مبارك عليكم الشهر

فيونكات تهنئكم بحلول هذا الشهر المبارك ..اتمه الله عليكم بالخيرو الصحة والعافية واجعلنا يارب من العابدين الصائمين التائبين إليك

اشرايكم بس ابرسمتي :)

دورة في رمضان

لما تقرون العنوان شنو تتوقعون ..يادورة ذكر او تحفيظ قرآن او فقه ... بس لما أكمل الاعلان اكتشف شي ثاني :دورة أشغال فنيه دورة طبخ دورة كره سله وقدم ...ووو
زين وين الدورات المفروض اتكون في شهر الذكر والقرآن وينهم ...حتى حلقات الذكر الي تقام طول السنه تتوقف في رمضان المفروض تتكثف في رمضان ...العذر ...إن الناس مشغولين في زيارة الارحام وبعدها القرقيعان وبعدها بالسوق للعيد صح في ناس جذي والاغلبيه يمكن ...بس في ناس يبون من يعينهم على التوبه ..يذكرهم فيالي تناسوه من سنن وفروض ..وفي ناس يبون يقضون الشهر بالذكر والحفظ ويبون من يعينهم ..مو صح كلامي وله شنو

مطاطير

أهلا يا فيونكات ... أنا أعرف إن تحبون تهدون امهاتكم هديه بمناسبة رمضان ، فقلت أعطيكم فكره حق السنه ، اكيد راح تعجبكم ، و خوش هديه حق أمهات ، و هي مطاطير مكتوب عليها (شاي و قهوه) . وحدة في الـfacebook إسمها I love suzani تسويهم . تقدرون تطلبون من الصور إلي موجوده عندها أو تودون لها مطاطيركم و تكتب عليهم إلي تبون . إذا ما عندكم account على الـ facebook تقدرون تدزون لها إيميل و تسإلونها إلي تبون

و هذا إيميلها : q8suzani@gmail.com

انا لله وانا اليه راجعون

اكثر من 41 امرأه وطفل توفوا في حادث مأساوي ابسبه نار شبت في خيمه عرس .. الله يصبر أهاليهم يارب .. وصبر أهالي المصابين .. وقومهم بالسلامه انشاءالله .

نتقدم بأحرالتعازي إلى أهالـــي المتــوفين في حادث حريق الجهـــراء، داعين المولى أن يلهمهم الصبر والسلـــوان، ويسكــن من فقدوهم الجنــــة.

تحديث

الزوجه الاولى اعترفت : انا احرقت الخيمه لأفسد عليهم ليلتهم .. ولم اتوقع سقوط ضحايا !!!

موتي الحريم مع بناتهم ..والكبار بالسن.. واليهال.. والبنات لصغار و4 من الحوامل توفو.. والخامسه اولدت بين الحريجه وطارو فيها المستشفى مع مولودها .. والي احترقت وماتت على طول ..ولي تعذبت وماتت.. ولي اختنقت ..ولي اتشوهو حتن ليل حين موقادرين يتعرفون عليهم ولي ولي .. هذي غير مأساه أهاليهم الله يصبرهم يارب .

كانت تردد : أبي اخرب العرس لأني احب زوجي .

وين يصرفونها لج ياالزوجه الاولى .. !!!! عمرها 23 سنه بس .. وعندها طفلين... اعفست وعذبت ديره كامله ابسبه الغيره ..عسى بس ابردت جبدج يالزوجه الأولى .. !!!! ماقول الا حسبي الله عليج .

هذا التحديث من جريده الرأي .

صار عادي هالشي !!!!

في وحده انعرفها مره أم عيال .. حاسه ان ولدها العود متغير او بالاخص شاكه فيه ان عنده سوالف .. فقامت راحت اتفتش ابغرفته .. فقامت اتدور بالادراج والكبتات وغيره وغيره وعفست الدار فوق تحت الا بتصيده ابشي .. اخر شي فكرت اتبطل الثلاجه الي بداره.. ويوم بطلتها جان اتشوف كيكه عيدميلاد وفيها صوره وحده !!!! اهنيه الأم انصدمت وتنحت بالصوره .. جان تقول (( هذي ولدي الي يحبها !!! مافيها زووود )) لووووووووووول الحين اهي مومعارضه والامعصبه ان يكلم وحده.. لأ .. ظايق خلها انها موحلوه لووووول .

ويوم سألناها اشسويتي معاه .. قالت ماكلمته والابينتله شي .. عشان كلساع اطيح عليه ابشي لوووول.. الام يازتلها السالفه لووول .

اكتشفت ان بعض امهات هالايام من كثر مايسمعون هالسوالف ان الواحد لازم يكون عنده وحده يكلمها قامو يتقبلون هالشي .. والعكس صحيح ..لأن مابيدهم شي اسوونه .. الشباب الي براسهم قامو يسوونه .بس في بعض الامهات بدعو حدهم .. انا سامعتلي سالفتين وحده اعرفها هم أم عازمه ناس ابيتها وفي وحده صغيره بالعمر بالعشرينات مايعرفونها عاد اسألوها منو هذي .. جان اتقولهم ( رفيجه ولدي ) !!!

والسالفه الثانيه .. ان رفيجتي معزومه بالخيران عند رفيجه أمها وكانت قاعده مع بناتها وقاعد اتشوف جم اصبي داش طالع عليهم والثاني رادف وحده بالجت .. عاد رفيجتي اتقول انا خابره ان ماعنكم خوان .. اثاري هذيل ( البوي فرند ) !!! لاتعليييييييييييييييق .

اتوقع الجيل القادم كل واحد يايب صاحبته ويلا يايبه صاحبها البيت وقاعدين كل العايله يتغدون مع بعض !!

adidas 1

حبيبتي bhr.qadsaweya مشكورة وايد على السؤال...أنا موجودة بس لاهية بمسلسلي العجيب يوسف الصديق ( ع ) ..ومرة ثانية مشكورة :)

وألحين أدخل بصلب موضوعي ..مكرمين جوتي adidas 1 زوجي كان يدور عليه يوم رحنا ماليزيا بس ما حصله يقول إنه في مميزات وبالكويت هم ماكو ولازم طلب عن طريق النت وهو كلش ما يحب شي عن طريق النت ..عاد يوم رحنا دبي سأل عنه ولقاه وعلى طول ما تردد شراه عليك بالعافية حبيبي ..يقول إنه داخله في ماكينة ويصلح للرياضيين وهو مخصوص حق الركض والماكينة هذي تغير ارضية الجوتي على حسب مكان الركض إذا كان يركض على حشيش أو قار أو تراب يتغير من تحت ( ما خلوا شي ) ..

ملاحظة : الصور مو من تصويري طلعتهم من صديقي google ..بس نفس جوتي زوجي :)

سوالف حريم

مساء الخير جميعا :) الصراحه ولهت اني اكتب .. قلت جني مصختهه حبتين :)

موضوعي اليوم سلمكم الله عن ( الزوجات شسوون اذا زوجهم يبي يطلع مع ربعه ) خل قولكم جم سالفه .

السالفه الاولى

وحده تقول اذا زوجي بيطلع مع ربعه اسوي روحي غشيانه ..وهو المسكين عباله صج .. ويي ولمها وخايف عليها وحالته حاله .. وهي تقعد تبتسم الابتسامه الشريره وابتسامه النصر ...طبعا مايشوفها تبتسم لأن لامها لووووول

السالفه الثانيه

وحده ثانيه من تشوفه بيطلع اوقفتله عند الباب وفاجه ايدها الثنتين عرض الباب .. اتقول شمشون الجبار .. وتقوله ماراح تطلع لو شصير لوووووول

السالفه الثالثه

وهذي من تشوفه قاعد يبدل اهدومه ومتزهب حق الطلعه .. ميلت راسها اشوي على جنب ونزلت الدمعه .. يعني مسكينه ..خو تدرون احنه دمعتها مايبيلها تعصر عشان تطلع لوووول

مسكين هالريل عطوه فجه اشوي .. خل يتنفس .. عاد انتي لاتسيرين لزقه معاه .. وين مايروح ريلج ابريله اتقول علج لازق .. ويلا اشرايكم يالشباب .. اليوم انا واقفه معاكم :)

ودمتم سالمين :)

انتهيت من الدورة التصوير

صارلي اسبوع في دوره أساسيات التصوير ..أنا كنت ماخذه دوره تصوير وتحميض بس من زمان وعلى كامرات الفلم ..والحين أنا شريت كامره أولمبس ووايد مطوره بالنسبه حق كامرتي القديمه (كانت باناسونك ديجيتال ) طاحت مني ونكسرت العدسه ..=) فقلت يله عمرها خلص معاي جذي لازم اشتري كامره المحترفين ..فقريت وبحثت طبعا أشهر ..وعرفت أن هناك مجموعه من الشركات متخصصه في الكامرات المطوره منها كوداكت - كانون طبعا المحبوبه عندنا بالكويت ومادري ليش كانون ..مع كل وحده فيها مميزات ولا وحده اسهل من الثانيه ولا احسن من الثانيه هذا طبعا من بحثي في المنتديات ..

المهم ..شفت الارقام وخترعت الي في كامرتي وايد اشياء ماكنت عارفتها...فقلت خلني ادخل دوره اتعلم عليها ..بس للاسف كانت الدوره بشكل عام تتكلم عن اشلون التصوير والاوضاع للتصوير والازرار التحكم بالكامره بشكل عام للكامرات البروفيشينال ..بس على كامرتي لا والله ماتعرفلها =( ويي ..بس استفدت وايد عن التصوير ..وأما كامرتي مالي الا النت والمنتديات ومنتدى ( عرب دي جي كوم ) حلو هذا المنتدى ويتكلم عن كامرتي لا بعد امخصص قسم عن انواع الكامرات ..وقالولي راح احتاج سنه على ما اتعلم عليها ..اتركم مع آخر درس في التصوير كان عن غروب الشمس كان يوم امس سوق شرق أمام سوق السمك

ولا اروع من جذي

من زمان زمان زمان ماكتب ادري اني مقصره ...... بس الحين رديت مع موضوع جدا شيق .

توني رادة من دبي كانت رحلة جدا حلوة ... حلوة وايد الاحلى الفندق الي سكنت فيه ... سكنا في اتلانتس

الرحلة داخل الفندق مو طبيعية منتجع رائع وحلو ما اذكر اني سكنت احلى من جذي وهو عبارة عن منتجع متكامل وهو جزيرة بروحها يعني لو ما طلعت من الفندق مو ضروري السفرة داخل الفندق كافي في سوق ومطاعم وحمام سباحة ومدينة مائية كبيرة وكاملة عشت اجمل ايام في حياتي اتركم مع بعض الصور ....

هذا مدخل الفندق

الاستقبال

هذي بعض مجسمات الدنات الموزعه بالفندق طبعا حدها عجيبه عبارة عن حبة لولو تتحرك بندفاع الماي

هذا مجسم من قوارير الزجاج الملون على شكل الشعب البحري

هذي عبارة عن رسومات مختلفة دار مدار الاستقبال

هذي الشعب المرجانية من قريب

هذي صورة الفندق من حمام السباحة

الاكواريوم الموجود بالفندق

تذاكر للمدينة المائية

هذي خزائن بالمدينة المائية ب 35 درهم

هذي ساعة يعطونكم ايها بالمدينة المائية لما تاخذون الخزانة وبنفس الوقت حق التشري بالمدينة وهي ضد الماي

هذا مدخل سوق الفندق

هذي عبارة عن غرف مائية تدخلونها اسمها الغرف الضائعة

وهذي شكل الغرف من الخارج

هذا محل تحميض الصور الي تصورها داخل المدينة المائية

هذي ثرية معلقة عند باب المدينة المائية اعجبتني وصورتها لكم

هذا الله يسلمكم محل يبيع اغراض السباحة وبعض الهدايا الصغيرة

بعض محلات الفندق

هني اتجاه برجنا الي احنا ساكنين فية

هذي عبارة عن كرستالات نازلة من السقف حق بار موجود بالفندق الي عجبني شكلهم مو البار

جكيناهم... وهم قاعدين ينظفون الاكواريوم

ان شاء الله يكون الموضوع عجبكم وقدرت اوصل الصور لكم عدل وشكرا