Gucci print

التنورة تشبه نقشه Gucci

link
السعر تقريبا 10 دنانير

Gucci show summer 2010

شوكلاته دارك ....بس النكهه نااار

أحب الككاو الدارك أدري معلومه قديمه ..بس اليديد في الموضوع ..بالغلط شريته بنكهت الفلفل من غير ما اميز صوره الفلفل

المهم فجيته وكليته وله ..شنو هذا ..فلفل ؟؟؟

واشوف القرطاص وله فلفل من صجهم ؟؟

شنو الحلو بطعم الفلفل بالككاو ؟؟

ذوقته زوجي ..اعجبه وايد وستانس عليه

صج الناس أذواق

ليش السواق كله تييهم جلطة؟

مسكين سايقنا ياته جلطة من جم أسبوع و دخل المستشفى فتره طويله و توه سووله قصطره و الحمد لله إهو بخير ألحين

بس الغريب إن وايد سواق يصير فيهم نفس الشي

سايق عمتي الله يرحمه توه متوفي من جلطة

رفيجتي نفس الشي ، مساكين هم سايقهم توفى

سايق عمت امي ، سووله عملية

و سايق يرانهم بعد ، ياتله جلطة و سوه عملية

تفسير أبوي ،إن السواق من يوصلون الكويت و نظام الأكل عندهم كله يتغير ، ياكلون وايد و ما يتحركون ، طول وقتهم بس ينطرون، فتنصك شرايينهم من هل الأكل الدسم

همممم و الله جايز ، من يدري ، بس صج شي غريب ، كله سواق

الصيف 2010 مرحبا بك

قصات ...الوان ....

طله مشرقه شقراء

خفه وبساطه وعمليه

ها قد ودعنا الجوى الحلو وأتت السرايات تذكرنا بنتهاء الربيع والجوى المعتدل ..وأتانا الصيف بشمسه المحرقه ..مع ربعه الرغبار والرطوبه السنعه .. مع هذا اتعودنا عليه صيفنا ..وكل طالع على البحر ..والشاليهات زحمه وناس كلهم لونهم اتحول ابرونز وشعر أشقر ..وتفنن بأكل البرد ..وكل شركه اتنزل مشروباتها البارده ..والعروض على الطياران ..والنوادي ..

عروض الصيف

وناسه الصيف لويه ونشاط وحركه ..صح نتأفأف ..بس مادري أحسه خفه وانتعاش ..والوان الصيف والموديلات الصنادل ..وزحمه القهاوي(طول السنه زحمه بس الصيف غير )..وفناتك البنات ..كل شي فيه حلو ...مادري اتوافقوني على رايي وله لأني أحب الصيف.

اخليكم مع مجموعه صور لهذا الصيف

خالي بروح يصلي

يخرع

خالي لما راح بصلي حط غترته و عقاله على الدري

بيض الخثاق

مساء الخير والجوري والنوير :) ذاك اليوم كنه معزومين على استقبال في فندق (كوستا دل سول) والمكان والبوفيه وايد مرتب وحلو .. بس لفت نظري شغله بالبوفيه موجود .. حاطين ( بيض الخثاق )انا مادري ان ينوكل حدي استغربت الناس تاكله وتحطه ابوفيهات الفنادق وحنه اليهال الي عندنا بالشاليه يلقطونهم وفقصونهم واحد واحد :p وصادف ان لسبوع الي طاف لقيناهم ابشاليهنه.. بس شلي ياكلون فيه !! خثاثيق داخل البيض صغار مع مايهم وحبلهم السري وعفستهم .. واااي استغفر الله جنه وييع :( هذا خثاق من الخثاثيق ..صايدينه عشان ياكلونه.. لأن اهلي من عشاق الخثاثيق :) هذا بيض الخثاق جنه عنب

ياناس الي عنده صخله ضايعه ترى لقيناهه اتمشى صوب الشاليهات :)

ليش توستيتي خالية؟

هاااااااي

أدري صارلي دهر مو كاتبه

بس صج كنت وايد وايد مشغولة بالدوام و مع البلوق الثاني، ماكو وقت اكتب هني ، لكن هذي المرة بحاول أخصص وقت حق الفيونكات


بما إن أول بوست لي بعد غياب طويل ، فبوست اليوم بكون خفيف و ظريف ... ليش توستيتي خالية؟

أنا دوامي من الـ 7:30 لين 3:30 و على ما أطلع إلا صايره الساعه 4 فأموووت من اليوع بالدوام ، و ما أبي كل يوم أطلب من بره أو أكل من الكفتيريا ، فدايما أييب وياي شي من البيت ، عندنا خدامه يديده مسكينه تحاول تتفنن بالطبخ و الوجبات الخفيفه إلي تزهبها لنا كل يوم الصبح. فذاك اليوم و أنا ميته يوع و باكل توستيتي إلا ألقاها خالية !!!! معقوله! شنو؟ نست تحط فيها شي؟؟؟ لما طالعتها عدل إلا حاطة ميونيييز لالالالالالالالالا ، ميونييز مو أكل !! من صجها!!!!!؟؟؟؟؟


عبالكم ما كليتها ؟كنت أتضور جوعا

الجو حلو

مساء الخير :) المشي هالأيام حلو .. استغلو هاليومين قبل لا ايينه الحر والواهي والرطوبه .. احسن وقت للمشي والجو يسير بدييع وعجييب عل 4:30 لين اذان المغرب .. واحلى وقت للمشي عل البحر احلا من الممشى الي بالمناطق .. اهناك وايد اشرح واحلى وتعدل النفسيه وتخلي الواحد فرش ومستانس طول يومه :) ومو اي مكان بالبحر .. احلى مكان بين المركز العلمي والمرينا .

وفي الحركه بركه .. ودمتم سالمين :)

مودو في جريدة الوطن

طبعا الموضوع كنت لازم انزله من زمان بس ماني عارفه شلون احط الصورة من موقع جريدة الوطن...

كان فيه ماراثون وروضة مودو مشاركة فيه...عاد مودو ما شاء الله عليه طلع المركز الأول ( ذكروا الله ) ....بس تدرون شغل الواسطات زرقوا عيال الحكام وخلو مودو المركز الرابع بدل الأول ...ما عليه يا وليدي المهم أخذت مركز ..

عاد شوفوه بجريدة الوطن واهوا لابس الميدالية ....في مهرجان " الصحة للجميع "

فديت عيونه أنا :)..مودو اللي دار مداره دائرة :)

هذا الخير اللي يحب يشوفه من الموقع :)

om mod ....

لفتات جميلة في عيد الأم

أول شي كل عام وكل الأمهات بخير.....وعسى ربي ما يحرم أحد من إنه يسمع هالكلمة ....عسى ربي يرزق الجميع :)

وعسى ربي يخلي لي أمي ويخليلكم أمهاتكم .....ويقدركم على برهم ورد شويه من الجميل اللي سوووه وقاعدين يسوونه لنا ...

بهاليوم أعتذر منج يمه على كل غلطة غلطتها بحقج سواء كان بقصد أو بدون قصد ...يمه اعذريني ودايم الدوم ادعي ...ادري ما يحتااج اوصيج ....بس اذكرج :)

احبج يمه وبعيوني اخدمج .....مرة ثانية يارب تحفظ كل أم :)

أول لفته :

رديت من الدوام ويسور ولدي الصغير كان مستقبلني بهالقلب ومكتوب عليه " أحبك أمي " وورقة مكتوب فيها كلمات حلوة حق الأم :

أمي الحبيبة الحب تعطينا نحبها وايد وغالية علينا

هي اللي ربتنا وتسهر علينا يا ربي تحفظها ولنا تخليها

اسم الله عليها

اسم الله عليها

.....خنقتني العبرة يوم عطاني إياها ....مسوينها بالحضانه :)... الله يفرح قلبي فيك إنشاء الله ويهديك يا رب ...:)

ثاني لفته :

رفيج زوجي مسوي أمس عزيمة حق الأمهات وقدموا لنا البنات هدايا بهالمناسبة ...ويابو لنا كيكة عليها أسماء كل الأمهات الموجودات ...وكل أم طفت شمعة من الشمعات ....عساكم تعودونه كل سنه ...بصراحة استانست وايد...ما ادري شنو الاحساس كان عبارة عن مزيج من المشاعر .....وعسى عمرك طويل وتشوف عيالك وعيال عيالك :)

لا يفوتكم اسمي بروحه واكبر اسم ( أم محمد )....:)

ثالث لفته :

للاسف ما صورت ولا صورة فيه كان احتفالنا بعيد الأم لماما الله يخليها لنا...تيمعنا عالبحر واختي ما قصرت طلبت لنا " بو عبدالله مشاوي " اللي كتبت عنه مره fatto موضوعها كان BBq ( اللي يحب يشوف الموضوع )...يمعه حلوة قدمنا فيها عقب العشا هدية حق أمي وخالتي :)..

رابع لفتة والأخيرة :

اليوم وصلت الدوام ولا اشوف على مكتبي وردة جورية حمرا عجيبه ...والمناسبة عيد الأم ومعاها كرت مكتوب عليه عبارة.....وهاللفتة كانت من فيونكتنا pearl حق كل الامهات بالإدارة كل وحده تيي تشوف على مكتبها ورده ومعاها كرت طبعا العبارات مختلفة ...تشكرين يا pearl وعقبال ما نشوفج يده :) لوووووووووووووول

ما قصرتي لفته حلوة وجميلة ومميزة ..

ليس في العالم .....وسادة.....أنعم من حضن الأم....:)

أمي يا كل الأمان ...امي يا نبع الحنان ......

يا ربي يخليكي يا أمي ...يا ست الحبايب يا حبيبة ....

في نظر العالم أنت أمي وفي نظري انت العالم .....

هديه من أنامل صغيره

بمناسبه يوم الام قدمتلي بنتي اغنيه وغتها لي وكلماتها من تأليفها ..وكانت هديتها من قطعه كرتون وقصاصه ورق ...ما أغلاها من هديه ويا مدى صدقها ..حين يعبر ويقدمها الطفل ...فعلا راح تحس بقيمتها ...حبيبتي بنتي ...الله يقدرني إني أبرج وأسعدج . الخط مو واضح راح أترجمه:

يا أميييي يا أميييي أنااااا أحبكيييي أحبكييي يا أمي يا أمي تحظني من كل قلبها ماما يا أمي أنت عزيزة علية ..دمعة تجنني يا أمي يا أمي العزيزة يا عزيزة .

الله هداج يا بنتي امسويه جسمي مربع لو مثلث اتقبلها بس مربع ..اظاهر وايد متنانه في نظرها .

موقف لا أحسد عليه..

ذاك اليوم وأنا راده من الدوام وصلت عند البيت ونزلت وبأمان الله قاعده أتكلم بالتلفون مع الفيونكة pearl وأنا بدخل شفت حيوان يتمشى بالحوش وبيطلع بالسكة ...أنا حسبالي قطوة وعاد ماشية وأسولف واي شنو هذا ....وأنا أكلم pearl أقولها واي جلب ( كلب) حشاكم ...يمه جلب وهي شنو om mod من صجج شتقولين ...............إي والله جلب المهم أهو كان يشمي عادي من شافني مخترعة قام يركض وأنا أركض وأهو يركض وراي ...تخيلوا إني قاعده ادابج بالشارع ...يمين يسار ....ماكو فكه وراي وراي .........حاولت ادزه بجنطتي وبيني وبينكم أهو ترى مو جلب عود ...كان صغير...بس ولو اسمه جلب :)

عاد المهم قلت دامه مو راضي يفك مني حطيت جنطتي وشفته واقف وراها ومو عارف شلون يوصلي ....وهديت جنطتي بالشارع وهات يا ركضة وهو وراااااااااااااي......ركضة على طول الممر ولما فوق عند باب الشقة بسرعة بطلت الباب ودشيت..وأنا اركض على السلم التفت ولا الجلب واقف بالممر مو عارف أنا وين رحت...:)

وقمت اطل على جنطتي من فوق لحد ياخذها ....وطرشت شغالتي تييبها وقلت لها ترى في جلب تحت ...وراحت مسكينه ...يوم يت أقولها ها طولتي تقول مدام تعبت وأنا اركض اروح مني مني هوا يجي ...لوووووووووووووووووووووووووووووول

دودهنى هالجلب .....

أم عليوي

شخباركم وحشتوني موت ...عاد ما أدري عنكم وحشتكم سوالفي ولا...؟؟؟

موضوعي اليوم شنو ذكرياتكم مع "أم عليوي "....أنا كنت أسوي نفس مودو أمسكها وأحطها على إيدي تمشي....وكنت استانس حدي :) ..

مودو وبروق ( بنت خالته ) مستانسين بأم عليوي...وردوني حق ذكرياتي القديمة :)..

فلم اليس في بلاد العجائب

أميرة القلوب

حبيته

الرسوم الاصليه

رابط الرسوم بالعربي

http://www.youtube.com/watch?v=_o3URBAItYQ

الفلم كان حلو ..صحيح قصته غير ..بس وايد ماخذين من احداث شفناها في الرسوم المتحركه الاصليه خصوصا الي كان يحب هذيه الشخصيه وكان اشوفها بستمرار راح يضحك ويقول نفس الرسوم .

بس بخصوص البنات الي اعمارهم سن 6 سنين وما فوق تقدر اتشوفه اما الاصغر يمكن يخافون لانه في اشياء اشوي اتفزز بس ماتخوف الي اطفاله من نوع مايخافون فعادي راح يحبون الفلم شيق حبيته

بس ما وديت بنتي حسيت ان الفلم ماراح يناسبها لانها اتخاف =)

لغه الفنتوسه

فنووسه عنتوووسه

كنتوووشه فتوووشه

بربوووشه فرفوووشه

بشوووشه بسبوووسه

كلبوووسه تنتووشه

شتووته لذوووذه

طعموووسه حلوووسه

عجوووبه فتوووخه

شنتوووخه كتكووته

عسوووله

موعبالكم طلاسم .. هذي أمي اتلاعب بنتي :)