إهداء إلى Fatto

الأغنية مألفها واحد برازيلي في سنه 1917 و إلي أدتها مغنية برازيلية إسمها Carmen Miranda بالأربعينات - إلي توه شفتوها بالفيديو و Dalida بعد غنتها بالسبعينات بالفرنسي . و الرنه إلي حاطتها Fatto بتلفونها ماني قادره ألقاها مادري منو إلي مغنيها ، تينن fatto من يرن تلفونك بالدوام ودي أرقص :)

LOST

الحلقة التاسعة من Lost راح تبدي في 25 ابريل واااااي ماني قادره أنطر

شالحالة....؟؟؟؟وين نرووووووووووووووووووح!!!

قبل جم يوم رحنا الحديقة نودي اليهال يلعبون ...و تعجبت من المكتوب عند باب الحديقة تصدقون إنه مكتوب عند المدخل ( ممنوع.ممنوع..ممنوع...............) عيل وين نروح...إذا بالحديقة ما يصير كل هذا لا حول الله ..وين نروح نبي مكان نونس فيه اليهال ونستانس نشوي يلعبون كرة..... لالالالالالالالا يقولون ما يصير.. الأخيرة إحنا معاكم فيها بس اللي قبل :( ..عماااااار يا كويت:)

حق إلي بلعومة إيعوره

ملعقة خل مع ربع قلاص ماي و بعدين يتم الغرغره (مو تشربونه ... بس غرغره) و شوفوا شلون راح يهدي البلعوم ، أنا ما أحب هل الأشياء بس لمه جربته ... مو طبيعي ، إفتكيت من العوار ، كل ساعتين غرغره أو عند الحاجه . تدرون من بدأ الحر و شغلنه المكيفات ما بقه أحد بالكويت ما صار مريض.

Fashion Shows

كل سنه في شهر 2 و شهر 9 أنزل صور عروض الأزياء إلي في أمريكا و ميلانو و باريس من الانترنت ، السنه عيزت ماقدرت انزل كل شي ، يمكن بعد لأن الهدوم ملوت الشتا إيظيقون الخلق غامجين ، ف ما أتشوق أنزلهم . بس لازم أبتدي ، أحس جنه واجب لازم أسوي. لازم يكون عندي data base و مرجع أرجعله بعدين. بعد ما انزل كل شي راح أقولكم شنو المودا و شنو الأشياء إلي ثبتها في شتاء 2008/2009 . السايتات إلي أنزل منها الصور إهيا style و elle و nymetro .

سينما

اليوم كلنا إتفقنه (بنات الدوام) إن انروح السينما ، بس كل وحده مع عيالها ... يعني جم شخص تتوقعون ؟؟ 16 شخص ، و الله زين ...توقعت بصير إزعاج و صراخ مع اليهال بس كان عادي. الفلم إلي رحناله (Harton hears a who) كان زوين ، توقعته أحله من جذي ،صوت الفيل كان Jim Carrey ، ما حسيت في روح Jim إلي كله إيسوي حركات و أصوات عجيبة ، كانت شخصية الفيل جدا عاديا ، ما ضحكت وايد. أعطي الفلم 5 من 10 . بس اليمعة كانت حلوه 10 على 10.

هدية

تذكرون يوم قلت لكم بروح استقبال وحده توها والده ؟ وقلت يمكن أشتري لها جلسة مساج (SPA) ؟ link ما شريت ... خفت ما تعجبها ، بدال الجلسة شريت لها روب حمام حق البيبي و cover حق فراش البيبي و يه كيس مخده و bed sheet. بس شنو سويت ؟ كتبت اسم البيبي (مساعد) على المخده و الـcover . انشاء الله يعجبها

توضيح...

حبيت بس أقولكم ..إنه الكيكة اللي حطيتها مو إهي الكيكة اللي يبناها حق مامي يوم عيد الأم ..إنشاء الله بحط لكم صورة الكيكة ..وسلامتكم:)

blue day

احنا كل أربعا اتفقنا ان كل الدوام يلبس لون معين .. فبدينا من الاسبوع الي طاف وكان لون ابيض مع جينز . وباجر انشاالله راح يكون اللون أزرق .. انا امنقيته ( لوني المفضل ) . وكل اسبوع وحده اتنقي لون ( ماكو شغل ) .

يومياتي

هاي بنات شلونكم شخباركم أنا أدري أتأخرت عليكم بس شسوي عندي معهد ومو فاضية وايد حبيت أقولكم عن يومياتي بالمعهد المليق أولاا أنا موظفة بوزارة ,,,,,,,, مو ضروري تعرفون :) وأدرس العصر بمعهد ,,,,,,, المهم كل يوم تكون لازم في سالفة أو قصة يالاستاذ معصب من أحد الطالبات ولا الطالبات مطلعين حرة الدوام بالاستاذ أوصارت مناوشات بين البنات مع بعضهم عاد ألحين ياه الحر كل يوم متخانقين على التكييف هذي تبي مكيف حرانه وهذي ماتبي تقول برد تو الناس ومسكين هالرمونت يا رايح ورى أو ياي جدام ياطافي التكييف يا مشغلينه على حده في يوم من الايام راح ينفجر الكمبريسر و الله يستر هذا ألحين بس عطيتكم نبذه وإنشاء الله المره اليايه راح تكو ن البداية ومع السلامه ألحين قبل لا أيي أحد ويزفني عندي وايد شغل بااااااي .

?Guess who

شوفوا الفيديو اول بعدين قولوا منو هذا

عرفتوه ؟؟؟؟؟

هذا Dr. House إسمة الصجي (Hugh Laurie ) كان إيمثل في حلقة إسمها Black Adder في الثمانينات مع الممثل (Rowan Atkinson) إلي إحنه إنعرفة بإسم Mr. Bean

اي تعدي !!!

تخيلاو أمس لمن رديت من الدوام لقيت ها الاستيكرزعند مدخل حديقتنا .. السالفه انهم بعفسون الحديقه فووق تحت .. بشيلون البيبان الخشب مال مدخل الحديقه ولازم الزرع مايكون عالي فلازم انحش نصه وحاطين ديوانيه بالحديقه راح اهدمونها موناقص الا يهدمون ابيوت الأوادم ..!!! الصراحه حروووني .. الديوانيه مومظايقه احد ولا امسكره ابطريج احد ومالها شغل بحد أصلا محد يدري ان في ديوانيه بالبيت من كثر ما اهيا معزوله .. امبييه بموت من الحره خرباو الكويت بدال لايعدلونها (....) يعني غلطت عليهم:) انزين والبيبان ملوت الحديقه شكووو شكووو شكووو ..عليهم اعقول الصراحه مو طبيعيه . اف بطو جبدي.

بيت لوذان

اليوم رحت مع إختي بيت لوذان إندور صندوق يحطون في شاي (أنواع من الشاي) ما لقينه إلي نبي ، بس شفه وايد أشياء حلوه ، مثل الطاولات إلي بالصوره تحت ، عليهم احرف عربية . و أشياء تعلقونهم على المطارة عشان الواحد يعرف شنو فيها . شرينه حق أمي فنايين قهوه ، بعد عليهم أحرف ... هذي الفترة إحنه فينا هوس الأحرف .

شنو الواحد يشتري هدية ؟؟

شنو الواحد يشتري هدية حق وحدة توها والده ؟ وهذا مو أول بيبي ، هذا البيبي رقم 3 ، ولد ، أصعب أو أصعب ، ما تدرين شنو تشترين ... رحنه اليوم السوق إندور على هدوم ...ماكو شي حلو ... آخر شي فكرنه ، بدال لا نشتري حق البيبي خل نشتري حق الأم المسكينة إلي حملت في تسع أشهر ، قلنه خلاص شكلنه بناخذ لها جلست مساج في أحسن SPA في الكويت . شرايكم ؟ يصير وله ما يصير؟

حضانة

اليوم كنه حاطين التلفزيون على قناة الوطن ، و بدأ برنامج (بنات و بس ) ... طبعا أنا أو إختي مو قاعدين نسمع عدل شنو يقولون ، بس قاعدين إنعيب ... بعدين حطوا فقرة عن حضانة أطفال ، الحلو بالحضانة إن فيها كاميرات فيديو إيصورون اليهال بالصف و الأهل يقدرون إيشوفون عيالهم بالانترنت ، وايد إعجبتني الفكرة ...جذي أحس الأم و الأبو ما يحاتون ...حاولت أعرف إسم الحضانة ما عرفت ، دورتها بالانترنت ما لقيت شي ، بس إلي أعرفه إنه صاحبت الحضانة بنت إسمها دلال الوزان .

بوق اشكره !

اختي هالايام قاعده اتدور كلشاي احمر حق دارها .. ويوم سافرنا الامارات ورحنا ( امارات مول ) لقينا هالتفون وعلى طول قالت باخذه .. وسألنا عن سعره وقالولنا 16 د.ك .. وقلنالها لاتاخذينا لأن راح تلقين ارخص منا ابمحل ثاني .. وفعلا يوم رحنا سوق التنين ( الصيني )لقيناه اهوا نفسا بالضبط نفس الصناعه ونفس كل شي ..قولاو ابجم؟2,500 د.ك لوماخذه الاولاني جان ماتت قهر . الله يعافي الأسواق الصينيه .

مشكورين حبيباتي

الله يعطيكم العافية على تجهيز الـ Blog ..وايد حلو وسوالفكم أحلى ..تأخرت عليكم وايد بس كنت لاهية بالتجهيز حق الحفلة اللي كانت أمس كانت وايد حلوة ومرتبة بفضل الله تعالى والمسابقات كانت أحلى وأحلى..بس الفوندو ما كان له مكان بسبب كثرة الحلويات بمناسبة عيدالماما ومنها انتهز الفرصة عشان أقول حق ماماتي وكل الأمهات كل عام وأنتوا بخير والله يطول أعماركم..وبس أقولكم مرة ثانية مشكورين..وفاتوووووووهدية ماماتج وايد حلوه عليها بالعافية عقبال ما عيالج يهدونج قولي آآآآآآآآآآمين :)

هديه امي لعيد الأم

هالساعه الي خذيتها حق امي الغاليه بس لون أبيض .. وخذيت نفسها حق خالتي ام زوجي هم ابيض بس السير ضعيف .. معني ما احب ( باريس ) بس اعجبتني ساعاتها

رديت من العرس

رحت اليوم الصالون الي قلت لكم عنه ... سويت شعري تكسير و رفعته شويه من جدام ، زوين حق حفله مو مختبه فيها ، و الحلو سويته بس إبـ 20 دينار .

RETRO SALON

تلفون رقم : 5330587

إطار الزرع

حده يشوق ... إلي يبي يطلب هذا العنوان : www.momastore.org

صالون Retro

سمعتوا عن صالون في جمعية قرطبة إسمه Retro؟ يقولون صارله تقريبا سنه ، باشر عندي عرس وبسوي شعري هناك...مادري شنو بيطلع؟؟؟؟

في نظر العالم أنت أمي و في نظري أنت العالم

كل عام و كل الأمهات بالف خير

يوم الجمعة يصادف يوم الأم 21-3 .. الصراحة الأم تستاهل نهديها طول عمرنا و كل يوم في ... لأنها تستاهل و شخصيا هالمرة حسيت في هاليوم غير عن كل سنة .. كل مرة انا أهدي أمي .. بس هالمرة بنتي لأول مرة تهديني هدية من شغل إيدها .. :) بنتي عمرها 3 سنوات و اليوم كانو بالحضانة كل طفل أمسوى هدية حق أمه و الصراحة كانت عندي تسوى و وايد اسعدتني :) شكرا بنتي ..عاد ما أوصيكم بالهدية الزينة حق أمهاتكم حتى لو وردة :) نشكرها على كل شىء سويته لنا

gladiator sandals

أولت أمس تغديت بالأفنيوز بعدها قلت خل أمر على جم محل أشوف شنوا نزلوا شي يديد... واحد من هل المحالات كان River Island ، أنا بس دخلت صوب الجواتي ، وقعت في غرام الصندل الى تشوفونه بالصوره فوق ... واااااو هذا بالضبط إلي كنت أدور علي ... ليمه ألحين ما أدري شنو ألبسه معاه ، بس ميخالف راح تطلعله لبسه إنشاء الله. الحلو إنه توه مساعه قاعدة أشوف سايت Brownsfashion.com وله يطلع لي الصندل الأصلي إلي River Isaln إمقلدينه. الأصلي من Azzedine Alaia و قيمته تقريبا 300 دينار . إبجم تتوقعون صندلي ؟؟؟؟؟

16 دينار :) وناسسسسسسسه

Azzedine Alaia

lost

اكبر مسلسل في غموض وأحداثا لو شنو ماتوقعونها .. الصراحه سيسن 4 حددا عجييب ومافيني صبر كل اسبوع انطر عشان اشوفه .. اخليكم انا الحين عشان اشوف الحلقه السابعه . ليل حين ماشفتها .. وتصبحون على خير.

الصبار

هذا نوع من أنواع الصبار الي موجود ابيتنا .. تخيلاو اذا بموت هالنوع من الصبار مو تذبل أوراقه وبس .. لأ .. سبحان الله أول شي يطلع جذع طويل من النص وفيه مثل ورد اصغار وبعدين اتموت .. وأترككم مع الصور.

ملاحظه : عمي ابو زوجي اهو الي قالي هالمعلومه :)

مجموعة Kate Moss للملابس من TOPSHOP صيف 2008

واااااي تقتل Kate Moss ليش اناس يموتون عليها ؟؟؟ ما احبها ما فيها زود هل الانسانه و لاه TOPSHOP مسوين لها مجموعة ملابس بعد!!!!!! بذمتكم شنو فيهم من موديل هل ملابس ؟؟؟؟؟

شكرا

أهلا يا fatto
شكرا جزيلا على الدعوه ، و هذي أول تجربة لي في كتابة المدونات ... خل نشوف شنو بنسوي أنا وياج

بدايتي

السلام عليكم ورحمه الله وبركاته ..

اعرفكم اول شي بسمي .. معاكم fatto انا في العقد الثاني من عمري made in kuwait :) .. بدايتي اني عرفت ال blogs بالصدفه وعجبتني فكرتها لمن علمتني اياه master ومن يومها يننت البنات الي بالدوام بالأسإله والمناقشه عن الاسم الي بختاره والمواضيع والصور والسوالف وغيرا .. ونشاالله تعجبكم مواضيعنا وسوالفنا .

مع تحياتي لكم