الثلاثاء، 22 يوليو 2008

إندور أثاث - الجزء الثاني

أمس رحنا (أنسي - Annecy) نكمل رحلة البحث عن أثاث ، في محل إسمه maisons du monde قلنا أكيد عنده إلي نبي ، و أشوه مثل ما توقعنا، لقينا الأثاث الأبيض ، انا طبعا ينيت مادري شنو آخذ ، كل شي حلو ، إفتر راسي ... أبي هذا الكرسي ، لأ أبي هذاك ، أبي ستاره ، أبي مكتب ... أبي أبي...
المشكله ما نقدر نشتري القطع الكبيره و الثقيله، ماكو مكان بالسياره ، فخذينا بس الأشياء الخفيفه و الصغيره ( مخده ، أبجوره ، قواطي ) . و سألنا عن محل ثاني قريب منا و دلونا على واحد في منطقه إسمها Thoiry بعدين ذكرنا إن العام كنا رايحين لها ، الزين بعد في محلهم الثاني إن الواحد يقدر يوقف سيارته يم المحل و يحط الأغراض ، و بعد هذاك أكبر فأكيد في أشياء أكثر.
بعدها دورنا Zara Home ، توه فاتح في أنسي ، خمطنه جم شي وطلعنا، انا طبعا جنون الأبيض ، لقيت لي روب أبيض و نعال ( مختبر مو دار ) .


المحل في أنسي
بالليل قعدت أتصفح الكتالوج إلي خذيته منهم و شفت وايد أشياء غير إلي بالمحل ، و إخترت إلي أبي ، بعدين قعدت اتخيل شلون داري راح تكون ، عاد انا ما اعرف بس أتخيل لازم أشوف شي جدامي ، ما اعرف أرسم ، قلت ما عندي إلا الكمبيوتر أسوي copy و paste ، بس من وين أييب الصور ؟؟؟

قلت مدام عندهم كتالوج أكيد عندهم web site ، وله صج ، بس كتبت إسمهم في google طلوعوا لي ، وناسه . طلعت صور كل الأشياء إلي أبيها و لزقتهم مع بعض ، و النتيجه بالصوره إلي تحت .


أنا أصلا مادري شنو مقاسات داري ، بس ركبت و بس ... صار باجر ( إلي أهو اليوم ) . و رحنا Thoiry ...



وصلنا المحل ، بس هذي المره ، أنا داشه بثقه ، أدري شنو أبي ، ناديت المره و إخترت وخلصنا و قالت لي متى بوصلونهم ، لما طلعنا ... جان تقولي أمي تره ما قلتي لها عن المكتبه ، و نسيتي بعد مكتب للتلفزيون . أوووووووه صــــــــح ، شلون نسيت.

لا و أقول بعد أدري شنو أبي !!!! يااااااااي



مو مشكله ، خل يوصلون الأغراض ونشوف إذا أكو مكان أصلا حق شي ثاني

هناك 8 تعليقات:

joy يقول...

انا احب الابيض عالاثاث
شرح
بس صج ماينفع بالكويت حلاته عندكم هناك بالعافية حبيبتي
كلش شغلج مزوء

master يقول...

joy:

شكرا شكرا يا جوي ، بس إنشاء الله يطلع مثل ما انا متخيله

Om MoD يقول...

أول ما تجهز غرفتج ضروري تصورينها أنا متشوقه وأشوفها :)

fatto يقول...

واي ياماستر وانه قاعده اقره البلوق قاعده اتخيلج ونتي اتسولفين معانه .

i miss u :(

master يقول...

om mod:
إنشاء الله بس تخلص أكيد بصورها

تبون صور قبل و بعد ؟؟؟
يعني قبل لا أحط الأثاث و بعد ما حطيته؟

fatto:
miss u too

Om MoD يقول...

إي والله جان زين ..قبل وبعد :) يكون أحلى ونكون معاج بالصورة :)

mai يقول...

تابعونـــا على العيسى للاثاث لتشـاهدـوا افضل عروض اثاث الكويت
مدونه شركة العيسى للاثاث
http://el-essa-furniture.blogspot.com/

mai يقول...

اتمنى ان تستمتعوا معانا بكل جديد وانتظرو منا افضل الاثاث ومعروضات دوتاش لاثاث التركى
http://dogtaskuwait.blogspot.com/