The November Bakery

مساء الخير والجوري والنوير :) من زمان ابخاطري أذوق هالكيكه لأن مثل ما انتو شايفين ( ماتوقااوم ) اتششوووق ,, صج لذييذه يوم طلبتها ... انصحكم فيها حق لزواره واليمعات ,, وكيكهم عموما وايد حلو انصحكم اتجربونه

رقمهم للتوصيل : 97313310

مكانهم : مجمع التلال - الشويخ - بجانب مجوهرات الفارس

موقعهم بالفيس بوك

روعه ابراج الكويت

مساء الخير والجوري والنوير :)

طبعا أمس كان يوم روعه ابروعه الأبراج والألعاب الناريه ... صج شغل متعوب عليه ... المنظر كان عجييب ... شكرا ياكويت :) صج استمتعنه :)

مطعم لحم جلاب

مساء الخير والجوري والنوير :)

ولد عمتي وربعه بالدوام كل يوم يطرشون الفراش عشان اييبلهم ريوق او غدا من مطعم يمهم وايد يمدحونه. في حمسه لحم خطيره عندهم .فطايحيله كل يوم فيه .عاد ذاك اليوم ياهم الفراش ايده خاليه قالوله وين الاكل ؟؟ قالهم : هذا مطعم سكر ,, لان هذا يبيع (((( لحم مال كلللللب) ))) قالها مثل الهندي الي مع حسينوه هههههه !!!!!!!!!!!! وااي تخيلو ويييييييييييييع قلبت جبدي ... شنو هذا المطعم الي لاذمه والا ضمير مالت عليه وعلى أشكاله ... مسكين كل من أكل من هالمطعم ... قلبي معاكم الصراحه ,, لو انا منكم اسوي غسيل معده ... وتشحيم حق أسناني وتفرك حق الساني ولثتي ... انا بس بعرف وين البلديه عنهم ؟؟؟؟ الظاهر شيشهم (حسينووه) ههههههه ॥ اترككم مع الفيديو : هدا مو ماكووول هههههههه

i phony تحطم

مساء الخير والجوري والنوير :) ولهت على الجميع :) كل يوم اقول بكتب .. وتعييز :) برررد مايساعد الواحد يطقطق اصابيعه بالكيبورد :)
نصيحه : لحد يستخدم تلفونه وخاصه الايفون4 بدون كفر لان كله زجاج من وره وجدام مومثل القديم .. شفتو اشصار في تلفوني :( انا اساسا املبسته كفر .. بس شلته عشان تلعب فبه بنتي .. وقلت بروح مشوار صغير وبرد .. توني نازله من السياره ويلا طرباااخخخخخ زلق من ايدي :((
منو يعرف محل يصلحلي تلفوني ؟؟ يقولي بليز :) وشكرا
الي موحاط كفر ومايدري من وين يشتري او عيزان يتحرك مثلي ( اتقول سودانيه ) يدش على هالموقع ... اضغط هنا----->( كفراتي ) الكفرات عجييه .. والصوره الي فوق هذا الكفر الي شريته عقب مانكسر تلفوني ( اشعقبه ) :) اهو بنفسجي بس مادري ليش قلب ازرق مع التصوير .

نهايه السنه 2010

مابقى شي من هذي السنه مرت بسرعه ...واشياء وايد صارت فيها ...كانت خفيفه ماحسيتها ثقيله او حزينه ..بس صارت وايد تطورات واشياء ما كنت اتوقع راح اتصير .
اشلون راح تنهون هذي السنه عندكم ترتيبات ..وله لاهين وماعندكم وقت ؟
أنا وحده اهتم في آخر اسبوعين في كل سنه ..أحاول اشوف كل أقربائي وأتيمع معاهم واشوف اخبارهم
بيتي اغير فيه ..أراجع اهدافي هل حققتها وله في مجال احققها في الايام الباقيه..
مكياجي و كريماتي اشوف مدة الانتهاء ..واسوي تصفيه ...جناطي ..شنو اخلي وله شنو ابي اشتري من الوان..
وايد اشياء اسويها ..وايد مشغوله هذي الايام ..وناسه
وانتوا شنو مخططاتكم ..؟ يوم 1/1 شنو اول شي راح اتسوونه في اول يوم في السنه اليديده

اهلا بالجميع .. طبعا كلكم اتعرفونه ..والاغلبيه كانو شارينه او اقربائهم شروه .... هذي الللعبه من الاشياء الي كنت احبها وكل مره اشتريها بنواعها ...ومن الاشياء الي احب أورثها اعيالي ..وطبعا بنتي حبته وكل ماتشوفه تشتريه .
وبعد من الاشياء الجميله في طفولتي البريئه لعبه "الباربي " اموت عليها ..وطبعا اول مايتني بنت كوت لها باربيات ...بس للأسف ماتحب تلعب فيهم ...حسافه بنات هل وقت ملاقه .
وهوايه القرائه ..كنت ومازلت اعشق الكتاب وريحت الورق ...وشريت وشريت اشكثر قصص بأنواعها كنت انا وبنتي نقراها قبل مانام ..بس في النهايه اتقولي انا ما أحب القراءه ...بس ساعات اشوفه قبل ماتنام اتفج لها قصه تقراها ..
فعرفت ان الهوايات ..والاشياء الي كنتي اتحبنها في صغرج صعب اتغرسينها في نفس اطفالج ..إلا اذا كانو اصلا جينيا يحبونها مهما حاولتي
طبعا هذا كلامي بعد 10 سنوات مصارعه احاول اعلمها اشياء وايد احس انها مفيده او لازم تتعلمها او شي انا احبه يكون فيها ...

المهم انتوا شنو الاشياء الي تتمنونه يكون متواجد او متوارث في اطفالكم ؟

يوم في روضتي

بصراحة اليوم كنت معزومة بروضة الحلو يسور بروضة العصافير ...روضة ولا كل الروضات سنع وعدال الله يعطيهم العافية من اصغرهم ليما أكبرهم ..

بهذا البوست حبيت اعبر عن شكري وامتناني لهم ...وبالذات أبلات يسور ( أبله ل و أبله ع )..

وعشان ما أظلم ابلات مودو اللي قبل هم أشكرهم ( أبله ر وأبله ق ) مودو لحد ألحين يتذكر أيام الروضة وما ينساها ..

نرجع حق صف يسور ..الحلو والمتميز أنه صف يسور عبارة عن خلية نحل وكان أهداء اليهال حق أمهاتهم قرشة عسل صغيرونه ..و الأبله ما قصرت خلت كل طفل يقول اللي يبيه حق أمه وكتبت كلامه في بطاقة وعطاها أمه وطبعا ورتنا قبلها تصوير فيديو حق اليهال واهم يقولون الكلمة..

درسهم حلو وخبرتهم عن الماء والهواء ..

شكرارشكرا من كل قلبي والله يوفقكم يا رب ...

كان ودي أحط لكم الصور بس حجمهم كبير وماني عارفه أصغرهم إذا أحد يقدر يفيدني أكون شاكره له ..

جنطه السفر

صباح الخير والجوري والنوير :) عندي لكم طريقه سهله لتحضير جنطه السفر وهالطريقه خذيتها أمانة من صديقتي الصدوقه ( أم مود ) .. أنا كنت لي بغيت أسافر أسويلي جدول أكتب فيه مثلا يوم السبت البس جينز مع قميص والاحد كذا مع كذا وهكذا .. بس طبقت طريقه أم مود حق جنطه بنتي .. الصراحه واايد اسهل للسفره ما أقعد ألوي ودور شباصتها ويلا دلاقها مع هالبدله .. أحط بدلتها ودلاقها وشباصتها ابجيس واحد وكتب عليه اليوم الي راح تلبسه :) حلوه الطريقه مو :) وااايد ريحنني .. شكرا أم موود :)

عرس حنه في الفجيره

صباح الخير والجوري والنوير :) بعد رحله خصب الممتعه .. ثاني يوم معزومين على عرس في الإمارات في إماره الفجيره .. طبعا انتو تدرون ان الاماراتيين عرسهم يكون طول الإسبوع بس إحنه رحنه ( يوم الحنه ) ويوم العرس العادي الي وراه على طول .. بالنسبه لي هذي أول مره أحضر عرس بره ديرتي فكان شي ممتع الصراحه وبنفس الوقت عشان اعرف عاداتهم وتقاليدهم بلعرس .. بس الغريب بالموضوع انا توقعت إن العروس اهي الي إحنونها بس طلع المعرس ! والعروس بالأساس ماحضرت الحفله .. لان قالولي قبلها بيوم كانو امسويلها حفله .. فقلت يمكن تعبانه .. والله مالومها سبوووع بحاله طق ورقص .. إحنه يوم واحد وراسنه يصدع من الطقطقه .. المهم حاطين كوشه أرضيه للمعرس .. وعقب مارقصو البنات .. يا المعرس وزافينه أهله بالرقص والأغاني والتصفق ولفلوس والحلاو الي قاعد يفلعونه فيه من بعيد ههههه مسكين كسر خاطري يوم انفلع بالحلاو .. الله يهداها الي قاعد تقط الحلاو جنها قاعده ترجم .. قطي من فوق على الأقل يطيح ابراسه مو بعينه ويلا ابخشمه .. المهم نرد حق موضوعنه .. فأول مايدش المعرس يكون شايل صينيه الحنه فوق راسه وعقب يشيلها اي احد ثاني .. وييكون لابس مثل حزام اخضر مربوط عالخصر والجتف .. ويقعد بالكوشه ومد ريله فوق الكوشيه عشان يحنون ريله .. بس الصراحه ماشفت هالمقطع من الزحمه .. بس شفت يوم يحط صبعه لصغير يم صبع عمه لأن أبوه متوفي الله يرحمه وعقب تيي المره الي اتحط حنه وتحنيهم مع بعض .. وعقب يمش الحنه ويفصخ لحزام الي قتلكم عنه ولبسه واحد خاطب ... وأترككم مه الصور :)

طبعا لازم أي وحده تروح العرس لازم اتحط حنه .. فحماتي تحنت .. وانا انسووووو اكره الحنه وريحتها



وهذا المعرس بوحزام لازم يمسكونه من الصوبين وزفونه لي الكوشه ( بعد أخاف يهون .. فمافي مجال للنحشه :) )


وهذي صينيه الحنه .. الي فيها شمع ترى مو جوكلت كيك .. هذي الحنه ههههه

وهذا واحد من أهلهم شايل الحنه ( طبعا الرياييل لهم حفله .. فلازم يفرون الفريج فيها مع غناوي ورقص لي الكوشه )

وجذي طريقه تحني الريل

وهذا صبع المعرس مع عمه :)

طبعا مافي نفسنه ( ممنوع اصطحاب الاطفال والاطفال مملكتهم بيتهم ومن هالحجي ) جنهم يقولون الي ماييب عياله يويله ويلااه :) عاد يوم سألت وحده ليش اليهال !!؟؟.. كلش ماله داعي .. قالتلي اذا قلنالهم لاتييبونهم محد راح إيي . . . عاد لاتشوفونهم شنو سوو بالعرس الي باليوم الي وراه .. كان بفندق 5 نجوم والصاله وايد حلوه .. والورد اموزع ابكل مكان وصوب الكوشه .. وقبل لاتيي العروس الورد كللللللله تنتف من اليهال .. الي يقطع الورد ووزعه ولي ياخذه وياكله ولي ينتفه ولي يحذفه .. حرااام والله ليييييش !!! المشكله مححححد يكلمهم الوضع حده عادييييييي والي يايبه عربانة ولدها وطبعا كل وحده ماسكه جنطه البيبي ولي ترضع بنتها ولي اتسكت الي تبجي ويلي ويلي ويلي .. مادري بالنسبه لي كلللش ما حبيت اليهال بالعرس.. بس الصراحه استانست واايد لأن تجربه يديده بالنسبه لي :) شكرا يا أم مروان وأبو مروان والعايله الكريمه كلها الي ضيفتها وحطتنه فوق راسها .. الصراحه ماقصرو معانه .. الي سوو معانه شي كبير الصراحه :) انردها لكم انشاءالله اذا شرفتونه الكويت :)

دعوة حسينية

شخباركم حبايب .....؟؟؟؟

إنشاء الله مرتاحين ....؟؟؟؟

ولو إنها متأخر بس ميخالف باقي جم يوم واللي يحب يحضر ويستفيد ..

دعوة زهرائية لأخواتي وأطفالهم للمجلس الحسيني بحوزة السيدة الزكية سلام الله عليها بمنطقة الأندلس ق 12 ش 15 م 22 ..

ت: 24880999 ...

لمدة 10 أيام ... من الأحد 5/12/2010 - 14/12/2010 ...

وسيكون من 6_8 مساءا ......وهناك مشاهد تمثيلية بالإضافة إلى المحاضرة ..

رحله خصب في عمان

صباح الخير والجوري والنوير :) الويكند الي طاف رحت منطقه في عمان اسمها ( خصب ) اهي منطقه بحريه فيها واايد سواح أجانب وصيدها من السمج موطبيعي .. المكان حدده عجييييب .. تمشينه بالمركب بين الجبال وعقب تغدينه بالمركب وحوالينه دلافين يناقزون :) صج صج وناااااسه .. طبعا المنظر عجيييييب وبنفس الوقت ريلااااااااااااكس والهوا نسناااااس .. يعني مكان سبحان الله قمه في الروعه .. احنه كنه طابين مطار الشارقه ومن المطار ودونه ناس عمانيين من معارفنه لي هالمنطقه .. طبعا على ماتوصلون هالمنطقه الا جبدكم قالبه من الطريج لأنها طريج جبال .. يعني ساعه ومادري اشكثر يميين يسااار يميين يسااار يمييين يسااار يمييين يسااار واااااي دار راسي من الطريج حدده متعب بس يستاهل الروحه :)) يعني حتن أهل عمان نفسهم لازم ادشون الإمارات عشان يروحون ( خصب ) لأن مافي منفذ من عمان لي خصب وشوفو الخريطه أحسن .. وأترككم مع الصور .

مسيره الفوز بكاس الخليج الكويتي 2010

كيكه الفوز :)

الفرحه امبينه بدون لاعلق :)

حتن الصعايده احتفلو معانه .. شايلينها شيله عالبحر :)

مساء الأزرق الي فرح قلوب أهل الكويت كلهم :) .. أدري بوستي متأخر بس ظروفي وماتسوي .. الصراحه ما أدري اشلون أعبر عن الي بداخلي من وناسه .. أحس لين الحين ماني مصدقه من الوناسه .. يومها كل العايله اقعدت تناقز من الوناسه من كبيرهم لي صغيرهم .. وطبعا على طووووول طلعنه الأعلام وطلعنا بالسياره وهرنات وأغاني وترفرف بالأعلام لييييين خقينه من الفراره مابقى شارع مارحناله :) صج كان الكل فرحان والكل قاعد يرقص والكل مبتسم .. الله يدوم أفراحنه يارب .. الصراحه منتخبنه ماقصر باللعب وهذا الكاس العاشر من 12 سنه .. صج فتره طويله بس الحمدالله .. فزنه وبجداااره :)

مبرووووك يامنتخبنه الكويتي

عيدي ياكويت بفوز الازرق

2011 من الآن

هديه لبدايه راس السنه 2011 راح اتكون مميزه ..احجز هديتك لاحبائك

CASA SPA

السلام عليكم ... شلونكم ..شخباركم

الله يسلمكم ويسلم الجميع ان شاء الله اليوم بقولكم عن بوست اخذيته من ME BLOGGING كانت كاتبة عن CASA SPA .. شوقني الموضوع وقلت خل اجربه طبعا كانت تجربه وايد حلو ومريحة اييون ليه البيت ويفكونج من الزحمة والمواقف .. الله يسلمكم دقيت عليهم وقلت لهم ابي بدكير ومنكير مع مساج خفيف حق ايدي وريلي .. والله واتفقت معاهم على الوقت واليوم وفعلا كانوا عندي بالتايم ( حبيتهم بسبت دقت مواعيدهم :) ) المهم يابت عدتها وقعدت تشتغل .. كان كل شئ حلو وبسرعه خلصت يمكن من الوناسه .. واهم شئ اني بالبيت بالبيجاما :) وهذي الصور ...

( بس شوي كانت قرقه ( يعني تتكلم وتتكلم ,,بالعربي ثرثاره ..)

شكرا ME BLOGGING

واخر شئ يعطونج تفاحه ...

واذا تبون تهادون احد .. عندهم فاوجر بالاشياء الي تبونها ويقدمونه بشكل وايد حلو ...