الجمعة، 29 مايو 2009

CD رياضه



اليوم رحت شريت كورن فلكس Fitness إليي قالت لي عنه رفيجتي ، معاه CD رياضه ، إيونس سهل ، كله نقزه و مدته 20 دقيقه بس. عبالكم انا سويت معاهم شي ، لالالالالاه ، أنا عيزانه و متكسره ، حطيت لي مخده و إنسدحت و إستمتعت بالأغاني الحلوه ، موديلي هل الأغاني ، متى ما صار فيني حيل إنشاء الله ، بسوي معاهم .

الخميس، 28 مايو 2009

جتف إي و جتف لأ


هابين بهل مايوه إليي بو جتف واحد
أنا ما كنت ادري ، أشوه إني شريت واحد
إللي بالصوره من TopShop

الاثنين، 25 مايو 2009

شفتوهم !!

وناسة شكل الماكينات ملوت الجمعية وايد حلو ومتطور ...على حسب الفئة يدخل الكاشيرالفلوس.. وإذا لك باجي في ماكينة صوب المشتري بس حق الخردة.. أما الأنواط يطلعون عند الكاشير ويرد لك الباجي ..عاش التطور عاش.. عاش.. عاش..
هذي حق الأنواط


هذي اللي حق الخردة

الخميس، 21 مايو 2009

بالطاقه الشمسيه

شاحن تلفون ..بالطاقه الشمسيه

من الصين ومادري اذا موجود بالكويت
وجربته حتى على الضوء العادي يشحن التلفون
أحسن من الشاحن الي شريته الي على البطاريه العاديه هذاك لازم اكون معاي بطاريه في جنطتي بس هذا مايبيله شي
وناسه ماخلو شي =)


الأربعاء، 20 مايو 2009

صبغ ..

إهني كان مكان التلفزيون البلازما ..شلته وغيرت مكانه وضل مكان البراقي امحفر ومشوه الطوفه ..الصبغ انضيف مافي شي ..وبكلم الصباغ بس علشان ممر اصغير طوفه وحده ما أعتقد يعبرني ويمرنا...ففكرنا (أنا وزوجي ) ليش مانسكر الفتحات ونصبغه احنا ابروحنا ..بس ماعندنا عده الصبغ ولا عندنا صبغ ...فقال خليني اشوف عدتي ...وفعلا راح ..ورد وله عندنا صبغ ابيض (لا ميلاون) وأخضر فاتح فستقي ..لالالا مابي ...أصفر ...ام ام ام ...ليش لا أصبغها أصفر ...صالتي ورق جدرانها أصفر وقرميدي ..فقال شنو تبين الاصفر قلت اي عندك لزاق الي مايخرب الطوفه البيجي ..(راح حق صندوق العجايب صندوق العده ) قلت خلنا نصبغ بس مكان التحفر خط عريض بس مو كل الطوفه ...ونشوف ...=) فعلا طبعا طلع بصندوق العجايب الفرش وخففنا اللون وشوفو النتيجه ...وناسه =) العده البسيطه
حددنا المكان وسكرنا الفتحات اول بالمعجون وصبغنا الوجه الاول ابيض وجربنا اشويه اصفر وله إخرع قلت خلنا انخففه


مقبول اللون في البدايه بس قلنا يله خربانه خربانه



ها جنا حلو بعد ما عطيناه وي ثاني وشلنا اللزاق

لا طلع حلو بعد ماركبنا المرايه ومليت المكان ...وناسه انحلت المشكله في أقل من 4ساعات .





الأسفنجة العجيبه



صباح يوم هادي .. من أيام الدوام الممله .. حوالي الساعة 11 الظهر و احنا في حالة ركود موطبيعي .. ماكو شغل ..
أن اصح التعبير :)
دخل علينا مندوب شركة و شايل معاه ( hand bag ) قلنا وليييين شكله يبيع مكياج والا عطور .. توه بنقوول
لا لا ما نبى ..بس الي صار طلعلنا اسفنجة .. جان يقول لنا هذة الاسفنجة العجيبة .. و تمسح اي شئ .. ما صدقنا فقام يجرب لنا على الطوفه و الارض و الزجاج .. انا استانست جان أقول و اللله شكله يبيله ناخذ وحدة قمت اشيش astlla , sun shin و خليتهم ياخذون معاي خذينا 3 ب 5 kd .. يقول الوحدة 2,500 .. تخيلو .. طلع الريال من عندنا ..
جان اقوم و اجرب بالإدارة كلها ما بقى شئ .. ما مسحته طوفة و دريشه و ارضية :) ...و الفراشين يقولون هذي شعندها تمسح ؟؟؟؟
بس صج تونس الأسفنجة .. و الحلو فيها بعد الاستعمال ما تخترب .. غسلوها بالماي و ترد مثل اول ..
هذا رقم الريال إذا تبون يوصل .. 55316075






الاثنين، 18 مايو 2009

ولها نعود ...


بعد عمري ديرتي الكويت ..... صج لو درت الدنيا ولفيت ما ألقى مثلج يا بلادي ..أحبج وهم بعد أحبج ...حق اللي يحبوني واللي يسإلون عني أقولكم أنا باجر برجع الديرة ...وأكيد بتنور بردتي ....يا رب يكون كل شي أوكي ...كتاكيتي ولهت عليكم وايد ....ما أدري شلون بنام ألحين وأنطر الصبح يطلع ....ولهانه ولهانه على كل شي أمي إخواني خواتي ورفيجاتي وكل اللي أعزهم ويعزوني ....
إنشاء الله إذا رديت والله قدرني أوافيكم بتفاصيل عن رحلتي ....
Om MoD

الأحد، 17 مايو 2009

نون على سلامته ....عيساني


اي والحمدالله ..طلع ولدي من المستشفى ..بأحسن حال ...والله كان فيه نوبه ربو حاده جدا جدا ...الى درجه ان الاوكسوجين نقص عنده ..حبيبي مع الوايرات الي عليه ودرب وكمام ..تعب وايد وتعبت معاه ..كان يقول الدكتور وصل ولدج الى مرحله الخطر ؟؟؟اسبوعين علاج بالوريد ..والحمدالله ..طلع وامس احتفلنا فيه ..ويبت معجنات من بريك توك وكب كيك من كريمبز وطبعا الحلاو من الجمعيه =) ...بعد ما رحنا واتخبنا العصر وطمنا ان كل الحضور ادى واجبه الوطني ..كتينا نون ..ونفتح البفيه ..والكل كان مستانس ومن زمان ماتيمعنا كلنا جذي ...الله يكثر افراحنا ..والله مايفرقنا .النونالكب كيك

طبق من البوفيه (معفوس الشويه من الهجوم )

احلا فوز للمرأه


مبروك عليكم يا اسيل ومعصومه وسلوى ورولا ..مبروك الفوز الكبير الي حققتوه .. حدي استانست عليكم .. تستاهلون الفوز :) وهم مبروك على ذكرى الرشيدي لأنها حققت نسبه وايد حلوه :) وهالله هالله فيكم بتغيير الكويت الى الأفضل :)
والصورمأخوذه من ( جريده الوطن )

السبت، 16 مايو 2009

منو مثلي

بان كيك -ككاو -ايس كريم ..هذا كان ريوقي ..جذي احب افطر ...من كنت اصغيره احب الخرابيط ..أكل صحي مافي
مع اني الحين واااااااااااااايد تعدل أكلي بسبب الرجيم (رجيم دايم ) بس ..إتيلي حالات اين ...غداي ..عشاي ..طول يومي حلو ..ولا بعد افنتك وادلع عمري وازين ...بس لما آكل وأخلص =( يضيق خلقي ..ليش كليت جذي ...ودي افطر فواكه ..واتغدى سلطه ..وأتعشى روب ..ياسلام على الاكل الصحي والمفيد ويضعف ...بس ماقدر ...والله عندي ملف كامل كله اوراق انظمه غذائيه ورجيم ..بس ما أطبق
مع إني مو شرهه بالاكل ...بس أحب الحلو وخصوصا الي يقث ..ما أحب الموالح ولا الاكل ..مايشهيني الاكل ...حتى لو رايحه اتغدى في مطعم ..أشوف شنو عندهم حلو ..وجذي أقدر أنقي شنو راح آكل وجبه رئيسيه ..مع إني ما أعترف فيها ...إتشوفوني جذي 3 إشهور خوش وحده ..ريوقي توسته ..وغداي مشواي ..وما اتعشى ...وفجأه حتى الي حوالين ينصدمون ؟؟؟؟ ...شنو تاكلين شنو هذا ...ليششششش؟؟؟
مادري ليش ؟ جذي ...أبي آكله
مثل اليوم ...بنتي تتريق كرون فلكس وحليب ...ولما شافت صحني قالت : ماما هذا ريوق ؟؟أحسه انصدمت ..ارفعت حواجبها ..وسكتت ...وااي طالعت صحني وقلت اي من حقها تتكلم ..ليش جذي أنا ..ماراح اكررها (كل مره اقولها ) بس صارلي جذي سنتين وأنا خافه أطباق جنونيه ..بس مازلت أين ..وأتحلم في اشلون ابتكر طبق حلو ثقيل ومنسق شنو احتاج ...وأسويلي وأنا فرحانه ..من صحني الي راح يطلع في شكله النهائي ..بس لازم أسيطر على نفسي ..واكون أشد من جذي ..لازم اكتب على الثلاجه (نعم للاكل الصحي ..ولا ولا ولا للحلو )

الأربعاء، 13 مايو 2009

Miracle of Kaaba


الأحد، 10 مايو 2009

صابون للجسم من غير ما تستخدمون الماي

أنا من زمان أدوره ..هذا المعقم للجسم والوي مثل الي نستخدمه لتعقيم الإدين ..بس اهوى مو جل لا سائل ..الله يسلمكم هذا احتجته الحين علشان ولدي ماقدر اسبحه مريض مليت وانا امسحه في فوطه وماي بس وله في كلينكس المبلل الي يستخدمونه للحفاض جونسن وتوابعه ...فكنت سامعه عن الصابون والشامبو يستخدم من غير ماي ..وينشف ابروحه ..وصج حسيت ولدي نظف كان امعفن مسكين حتى راسه غسلته فيه ..وزين الي فيه مافي ريحه قويه كلش خفيفه وناعمه صج صابون اطفال ..لقيته في صيدله بيان 2.500دك درت السالميه كلها مالقيته ..حتى انا اغسل ايدي فيه علشان ريحته اتونس =)

احسنو الإختيار ....


بيبدى العد التنازلي و ما بقي شىء ليوم الانتخاب. و المرشحين بوضع صعب و كل واحد يحاتي روحه يكون و الا مايكون ..
صج سمعت وايد في عزوف عن التوصويت .. و وايد ناس تقول ملينه و ما صارت .. و لي متي .. بس الواحد لازم ..
يستحمل و يروح و يتعني و يصوت .. لان اذا الواحد ما راح و الا صوت راح يطلع الأسوأ .. فلازم نتعقل بالاختيار ..
شوفو عاد .. شلون تقتنعون بالمرشح .. من خلال شعاراتهم و يا كثرها و الا من خلال كلامهم الي بالندوه شئ
و المجلس شئ .
ياله شوفو الشعارات ..
أسيل العوضي / وطن من جديد / الدائرة الثالثة
رولا دشتي / مسؤليتنا / الدائرة الثالثة
مرزوق الغانم / اياك و الياس من وطنك / الدائرة الثانية
وسمي الوسمي / نعم نستطيع / الدائرة الاولي
ذكري الرشيدي / لبوا نداء الوطن / الدائرة الرابعة
الصيفي الصيفي / للقيم نعمل / الدائرة الخامسة
بس للعلم تري الاختيار حده عشوائي ..

السبت، 9 مايو 2009

ينطرون ييّت جاجا


يوم اليمعة يوم يمعتنا ولازم عقب الغدا شغالة أخوي اللي صار لها الف سنه عندنا واللي صارت فرد من العائلة الكريمة :) كل واحد من عيالنا إيي ياخذ مصروفه عشان يعطيها ويقولها شنو يبي من الفرع ولا تشوفونهم أول ما تيي كلهم ركضة صوبها ويقول وين جيسي :)


والحلو فيها إنها كل واحد تحط أغراضه بجيس وعلى حسب الأعمار تشتري الأغراض وتساوي بينهم وتشتري لهم نفس الشي عشان محد يشوف شي عند الثاني ومو عنده ويقعد يبجي :) وإذا كان شتا ما تشتري بريد لهم ..يعني عارفة كل القوانين بدون ما نقولها والله مريحتنا بدل ما ناخذهم ونوديهم ..:)



الله يكون بعونج جاجا ( هذا إسمها ) وبصراحة ما تقصرين ..لا خلا ولا عدم ..



شوفوا يسور مع نانو ( اسم الدلع حق ولد خالة يسور ) فرحانين بجياسهم :) ربي يحفظكم من كل شر :)

الثلاثاء، 5 مايو 2009

سلاسل


إبره تقدم لكم إكسسوارات جديده




سلسله بلون أصفر فاقع

مرجان

سلسله اخرى بلون آخر ، برتقالي فاقع



تجدونهم عند Hadeya Station . com

عندهم بعد أشياء حلوه ، إذا قاعدين إدورون هديه حق أحد

اسماء المناطق الغريبه العجيبه

أنا اتعجب الصراحه من أسامي المناطق الي يسمونهم .. اهو منو بالضبط يسمي ؟؟ هل اذا هالشخص اذا سمى .. بدون مناقشه للإسم يوافقون عليه ؟؟ ويلا شنو ؟؟ بس ابي افهم ..!! خن اعطيكم مثلا المناطق الي بلكويت :
المهبوله !!
يعني ليش مهبوله .. لمن دورت بالنت عن المعنه طلعي ( فقد كانت تسكنها إمرأه مجنونه تخيف الناس )
انزين الحين هديتو كل الصاحين وييتو عل الفقيره المينونه وسميتوها مهبوله!! بلا هذا سبب !! حرام والله.
كل منطقه الحين في احد مينون .. الله يشافيهم .. زين ماسميتو باجي المناطق ( المصرقع _ المينون _ الأهبل )
ابو الحصانيه :
انا عبالي فيها حصن وايد .. بس قلت نحن في الكويت وليس في المكسيك لوووول أثاري طلع ( فيها وايد ثعالب )
ابو حليفه :
سموه عشان متروسه هالمنطقه زرع اسمه ( الحلفاء ) احنه شكو بالزرع .. الله والزرع عاد . ولااا بعد يقولون في اسم ثاني ( أصابع فاطمه ) حتن اسمي ماسلم منهم .. اتهقون هالزرعه تشبه اصابيعي :)
جزيره عوهه :
اهم شي ان لمن دورت بالنت طلعلي ( فيها عاهات كثيره ) لوووول عجبني الوصف الصراحه . يعني الارض فيها عاهه رمليه .
وغير الظهر والمنقف وهديه ووو .
++++++++++++++
بس لمن سمعت ابمناطق السعوديه .. حبيت اسامي مناطقنه :) .. بكتبهم بدون لاعلق :) اخاف انعدم خو هناك من اسامي مناطقهم امبين انهم مايتغشمرون :) لوول
ام الجماجم - ام العقارب - ابا الدود - جفن ضب - ام الهوشات - جرب - عرقوب البقر - ساحوق - الشبحه . ماقول الا سكنهم مساكنهم .. الظاهر هذا مشعوذ امسميهم .
لوووول لاتعلييييق ياحلو اسامي مناطق الكويت .. اتينن مو ؟ :)
ملاحظه :
أسماء مناطق السعوديه واصلي ( ايميل ) .

الأحد، 3 مايو 2009

ثلاثة على يال البحر .. تضوي من بعيد

عرفتوها و الا ما عرفتوها ..؟
ابراج الكويت تحجي حاضر بلادي .. انشوفها من بعيد بس منو يفكر يزورها .. انا خبري فيها من يوم كنت صغيرة ..
( يعني الحين انا مشدقة ) :) ..
زايرينا ضيوف من السعودية .. و تم ترشيح مطعم الي في الابراج .. لان الريوق يكون مخصص للنساء فقط ..
( علشان ياخذون راحتهم )..تقييمي للمطعم ..كالآتي : المنظر من فوق كان فتاك و عجيب .. و الاكل كان جدا عادي ..
بس الي صج يبيله تغيير من عرجة .. الديكور و الاثاث .. من صج وايد قديم و لازم يتغير ..
وعقب صعدنا فوق بالدائرة الي تدور .. دار راسى :) بس وناسة ..
فدعوة .. لاحياء معلم من معالم كويتنا .. زوروا الابراج .. :) ..
اخليكم مع الصور ..
حلو المنظر ..

ال 3 مطاعم الجديدة ..


الاكوابارك ..


( عذرا على الصورلانها من ال phon :)

سوالف دواوين



بخاطري اروح ديوانيه من الدواوين .. بس شنو .. ابي اكون ( غير مرئيه ) وانه قاعده معاهم ..لووول هذا حلمي من زمان مادري ليش :) احس سوالفهم اتينن وتضحك .. بس مابي دواوين الشباب الي ( بعضهم ) فيها سوالف بنات وتشيحط كل واحد جم كلم واي احلا وحده لالالا .. ابي دوانيه شياب .. ياحلوهم وياحلو سوالفهم .

++++++++++++

خن قولكم سالفه ابديوانيه العايله :
واحد ياي ديوانيه العايله اهو عود بالعمر اشوي .. صايرتله سالفه في ديوانيه من الديواوين الي يروحلها .. عاد يقول من اقعد ابمكان .. يا تاجر وقالي بوفلان دن اشويه هالصوب .. ودني مسكين .. وشوي ايي عضو وقوله بوفلان دن اشوي اهني .. ودني .. ويي شيخ وقوله بوفلان دن اشوه اهنيه .. ويقول ماوعيت الا انا طلعت بره لووول واي حبيبي والله مسكين .. قاعد يقول في دواوين مايحترمون .. اما دوانيتكم تحترمون الكل وترحبون فيه وتوصلونه لي بغا يطلع ليل الباب . احم احم :) هذي الدواوين ويلا بلاش :) وشنو يعني عضو ويلا تاجر ويلا شيخ .. ماتحترمون الشيب الي ابراس هالشايب الي كبر ابوكم .. الصراحه في ناس ماتستحي كلش .



++++++++++++

وسالفه ثانيه في احد الدواوين :


دقت المرشحه ( أسيل العوضي ) على احد الدواوين عشان بتزورهم وتلقي خطبه طبعا :) وطارو من الفرحه :)عاد اهل هالديوانيه دايما يتيمعون الساعه 10 .. بس هالمره الكل ياي الساعه 8 :) لووول والمشكله ان الشياب الي فيها يايين (بنيو لوك) الي صابغ الشوارب ولي متكشخ عالآخر وحدهم متزقرتين وهالمره الكل ياي :) لوول ..ونطرو لي الساعه 11 ومايت ويوم دقو عليها قالت انا اعتذر .. اوووووه اشسوو .. قاعدين يقولولها انت وعدتينا ومايسير وسمعتج ومن هالحجي .. الا يبونها اتيي مايبون هالصبغ والكشخه اتروح عالفاظي لوووول .. ويوم يت مابقى حكمه ماقطوها ومابقى تفلسف ماتفلسفو على راسها لووول .
شفت ياكظماوي .. هالسالفه رداً على
( بوستك ) شفت الرياييل اشلون اختبصو والشياب تشببو لمن يت .. اكيد لأنها امرأه وجميله :)

السبت، 2 مايو 2009

عجينه المارشميلو


طبعا هذي العجينه أخذت طريقتها من أحد المنتديات ..بس نسيت إي منتدى ..شكرا على الطريقه السهله وبسيطه يا مادري منو- أحد الفنانات والعبقريه الى أفادتنا ..
طبعا في طرق وايد لعجينه السكر لتزيين الكيك ..بس عجينه المارشميلو اسهل طريقه ...بس تحتاجون تب =) اي كميه واااااااااااااااايد من السكر البودره ..وقوه جسديه للعجن (مت وآنا أعجن طاح حيلي ) بس المهم سويت العجينه وهي : كيس كبير مارشميلو (خد البنات)+جدر او تب شكر بودر و4 ملاعق ماي ..بس
اتحطين المارشميلو على النار لما اذوب (نار هاديه) مع 4 ملاعق ماي ..وبعدها اتحطونها على سطح ابلاستيكي وتيمعونه بملعقه من الخارج الى الداخل مع وضع سكر البودره ..الى ان تصبح عجينه غير لصقه ثم تعجن باليد وتقسم وتلف بنايلون وتوضع الفريزر ..وقطعت قطعه صغيره من العجينه لتجربتها وكانت النتيجه =) مرضيه ..صنعت حلاو على شكل ورد ..أشكلها بهذا الشكلوألفها مثل الحلزونأضع نقطه من اللون الاخضر
وأعجنها حتى يتوزع على كل العجينه


وأفردها مثل العجينه الاولى على شكل اصطوانه وأقطعها قطع صغيره


بعد تشكيلها على شكل ورقه أمرر عليها عود الاسنان لرسم خط



بعدها أجمعهم مع بعض لتشكيل الورده وأغرس عود الاسنان ...ها شرحي وافي وله لا =)










الجمعة، 1 مايو 2009

رحلتي إلى بنك الدم

قبل جم أسبوع تقريبا سويت تحليل دم ...والنتيجة طلعت إنه نسبة دمي مرتفعة ( صلوا عالنبي )..وسألتني إذا راسي يعورني ولا لأ ..وصج كان قبل فترة راسي يعورني وكنت طايحة بالجاي والقهوة وماكو فايدة ..وقالت لي تقدرين تتبرعين بالدم .. قمت وقلت حق زوجي العزيز ودني اتبرع طلعت نسبة دمي مرتفعة وراسي يعورني وايد ..يمكن ليش إني كنت ماخذه كورس حديد ولمدة شهرين متابعين ( ما ادري هذا تحليلي والله اعلم )..رحنا بنك الدم وخطواتي بدت تتباطئ وجني هونت وعادي اتحمل عوار الراس ..أخاف من الإبرة وكلش كلش ما أحب سحب الدم ..زوجي يقولي يالله شفيج تمشين جذيه ..اقوله ما فيني شي ...عادي ..بس الصراحة جنه يوم صارت الصجية ترددت ..المهم وصلنا وخذيت هالورقة عقب ما خذوا بطاقتي المدنية وفتحوا لي ملف وطبعوا على ورقتي ( متبرع لأول مرة ).. خذيت الورقة ورحت حق هالغرفة .....خذوا دم من صبعي وعندهم جهاز صغير يفحصون نسبة الدم فيه ...جان تقولي الممرضة ترى نسبة دمج نازله ...ممكن ما يسمح الدكتور تتبرعين ...وووووووي.....شلون ؟؟؟ قلت لها معقوله ..توه مسوين لي فحص وقالولي إنه نسبة دمي مرتفعة ..قالت لي خليني أعيد لج التحليل ..وعادتة ونفس الشي ...ومثل ما تشوفون نسبة دمي واضحة ( 122 ) قولوا ما شاء الله
عقب رحت فحصوا الضغط وعبيت الورقة اللي شفتوها فوق ( اللي لونها أبيض )...الحمد الله كل شي اوكي ...وتوجهت عند غرفة التبرع ..زوجي قالي عادي حتى لو نسبة دمج عادية تبرعي ..قلت له جني ما ابي هونت ..قلت له أوكي بشوف الدكتور شقول إذا قال مسموح بتبرع وإذا قال لأ ما أبي ..دشيت على الدكتور جان يقول : لآ حضرتك نسبة دمك ما تسمحش إنك تتبرعي ...ويوم سألته عن النسبة الطبيعية قالي 125 ..حمد الله أنا مو وايد أنزل من الطبيعي ..يعني زين ...بس ما رضى لي اتبرع ...ومسكين زوجي ياي معاي ونبي نتبرع مع بعض اهو تبرع وأنا لأ ..:)هذا زوجي وأهو يتبرع ...( ما شاء الله عليك ربي يحفظك من كل عين )
بس للأسف شوفوا المتبرعين عقب ما يتبرعون يعطونهم عصير كي دي دي ...وين تعتقدون يقطون جيس العود ...بأصيص الزرع ..مع إنه الزبالة ( عزكم الله ) عقب شوي ..بس ماكو فايدة ما يحافظون على شي نظيف ...عسى الله يهديهم